Qazaqistandiki "doppalife.com" yashlar tori terbiye ishlirigha chong ehmiyet bermekte

Ixtiyariy muxbirimiz oyghan
2016-12-26
Élxet
Pikir
Share
Print
"doppalife.com" yashlar tori ötküzgen xeyrxahliq pa'aliyitidin körünüsh 2016-yili 20-dékabir, almata.
"doppalife.com" yashlar tori ötküzgen xeyrxahliq pa'aliyitidin körünüsh 2016-yili 20-dékabir, almata.
RFA/Oyghan

Ötken esirning 90-yilliridin kéyin qazaqistanda arqa-arqidin teshkil qilin'ghan Uyghur jem'iyetlik birleshmiliri Uyghur xelqining milliy-örp-adetlirini, medeniyitini rawajlandurush, Uyghur mekteplirige oqughuchi toplash we bashqimu pa'aliyetlerni janlandurush ishlirigha aktip kirishken idi. Ular hakimiyet orunliri, bilim we ilim dergahliri, medeniyet we sen'et merkezliri bilen birlikte ish élip bardi. Shularning biri "Inayet" jem'iyetlik birleshmisidur.

Igilishimizche, merhum turghanjan rozaxunof teripidin qurulghan mezkur birleshme yashlargha aliy bilim bérish, ularni wetenperwerlik, milletperwerlik rohta terbiyilesh yönilishide köpligen ishlarni emelge ashurghan idi.

Buningdin ikki yil ilgiri "Inayet" birleshmisining aktip qollap-quwwetlishide échilghan "Doppalayf.Kom", ( doppalife.com) Yashlar tori Uyghur yashliri arisida ana tilini, milliy örp-adetlerni terghib qilish, yash talantlarni yétildürüsh, Uyghur alimliri we yazghuchilirining emgeklirini tonushturush oxshash pa'aliyetlerni yürgüzüshke bashlidi.

Mezkur yashlar torining muxbiri adilem mesimjanning éytishiche, "Doppalayf.Kom" ning asasiy meqsiti tor arqiliq Uyghur yashlirigha Uyghur xelqining tarixi we medeniyitini, örp-adetlirini zamaniwilashturulghan qélipta yetküzüshtur. Bu jehette pütkül tor boyiche uning ezalirida mukemmelleshken iradilik shekillen'gen idi. A. Mesimjan yashlar torining ene shundaq meqsetlerni közligen halda bu yili bir qatar pa'aliyetlerni élip barghanliqini tekitlep, mundaq dédi: "12-Ayning 9-küni qirghizistan shehiri bishkekte Uyghur yashlirining 'yashliq awazi' topi hemkarliqida 'yashliq awazi' aliy mukapatini tapshurush pa'aliyitini ötküzduq. Yene bir pa'aliyet Uyghur tiyatirida merhum naxshichi murat nasirof xatirisige béghishlan'ghan 6-nöwetlik muzika musabiqisi".

A. Mesimjanning bildürüshiche, mezkur yashlar tori 12-ayning 20-küni almatada "Inayet" birleshmisi bilen birlikte mejruh balilargha xeyrxahliq yéngi yil archa bayrimini ötküzüp bergen hem ulargha tor namidin sowghilirini tapshurghan. Buningdin tashqiri yash sen'etkarlar we bashqilar "Doppalayf" yashlar tori bilen birlikte her xil pa'aliyetlerni ötküzüshni en'enige aylandurmaqta. Shularning biri mushu ayning 5-küni firansuz en'eniwi naxsha musabiqisining sahibi alimjan zulpiqarof özining tunji naxshilar toplimini tonushturush kéchilikini ötküzüshidur.

A. Mesimjan kélechek pilanlar heqqide toxtilip, mundaq dédi: "Doppalayf kélechekte mushundaq pa'aliyetlerni ötküzüp hemde médi'a layihilerni téximu qiziqarliq qilip ishlep, tor bétini téximu mukemmelleshtürüsh wezipisini qoyidu".

Ziyaritimizni qobul qilghan almata wilayiti emgekchiqazaq nahiyesining turghuni a'idem eysarowa "Inayet" jem'iyetlik birleshmisining yétekchilikide "Doppalayf.Kom" yeni "doppalife.com" yashlar torining bügünki künde élip bériwatqan pa'aliyetliri üstide toxtilip, mundaq dédi: "Inayet birleshmisining yash ewlad üchün qiliwatqan pa'aliyiti nurghun. Chélek tewesi bilen zich munasiwet yasighan merhum turghanjan aka rozaxunof muzika, ten-heriket saheside da'im yashlarni qollap-quwwetligen. Bügünki künde uning ishini bésip kéliwatqan sülfi meshrepofning ismini alahide éytqum kéliwatidu. Bu inimiz yashlarning béshini qoshup, ötküzüwatqan uchrishishliri, musabiqiliri yashlarni milliylikni söyüshke dewet qilip, qazaqistan wetenperwerlikige terbiyilewatidu. Mushundaq ilghar, bilimchan we rohi üstün ewladlirimiz köpiyiwersun. Biz ularni peqetla qollap-quwwetleymiz".

Metbu'at sehipiliridin melum bolushiche, t. Rozaxunof rehberlikidiki "Inayet" jem'iyetlik birleshmisi almata shehiri we almata wilayitining panfilof, Uyghur, emgekchiqazaq, talghir nahiyiliride ma'arip, ilim, edebiyat, sen'et, ten-heriket we bashqimu sahelerde köpligen pa'aliyetlerni ötküzgen idi. Buningdin tashqiri u bolupmu mejruh balilarni jelp qilghan halda ressamliq, muzika musabiqilirinimu pat-patla ötküzüp turghan. T. Rozaxunofning teshebbusi we uyushturushi bilen ötken yili rusiyediki por-bajin Uyghur sépiligha ilmiy ékspéditsiye emelge ashurulghan idi.

Toluq bet