Qirghizistanda milliy armiye küni we barin weqesi xatirilendi

Ixtiyariy muxbirimiz féruze
2018.04.10
barin-inqilabi-xatire-qirghizistan.jpg Milliy armiye küni we barin weqesi xatirilesh pa'aliyitidin körünüsh. 2018-Yili 8-aprél, qirghizistan.
RFA/Féruze

Uyghur xelqining tarixida aprél éyida yüz bergen muhim weqelerni qirghizistan Uyghurliri ikki kün dawamida xatirileshti.

1945-Yili qurulghan sabiq milliy armiye künini xatirilesh pa'aliyiti 8-aprél küni jalal-abad shehiride tentenilik ötküzüldi. Murasim jalal-abad wilayitidiki “Ittipaq” shöbisi teripidin uyushturuldi. Mezkur pa'aliyetke qirghizistan Uyghurliri “Ittipaq” jem'iyitining re'isi artiq hajiyéf we mu'awin re'isi isma'il tayirof, jalal-abad wilayitining aqsaqallar kéngishining re'isi erkin imankuluf, shundaqla jalal-abad wilayitidiki yézilardin kelgen Uyghur ahalisi qatnashti. Murasimda jalal-abad shehiridiki “Ittipaq” shöbisining re'isi rozaxun qurbanof riyasetchilik qildi, imam-xatip elishir nasiraxunof milliy armiye heqqide tarixiy doklat oqudi, ixtiyariy sözlerge chiqqanlar özlirining ümidliri we hés-tuyghulirini izhar qilishti.

Shundaqla 9-aprél küni bishkek shehiride “Ittipaq” jem'iyitining uyushturushi bilen milliy armiye künini we barin weqesini xatirilesh pa'aliyiti ötküzüldi. Murasimgha chuy wilayitidiki Uyghur jama'etchiliki qatnashti, bu yighin'gha qirghizistan Uyghurliri “Ittipaq” jem'iyitining re'isi artiq hajiyéf riyasetchilik qildi. Aldi bilen ghazi-qehrimanlargha atap xetme-qur'an qilindi, andin siyasiy penlerning magistiri abduraxim hapizi milliy armiye jenglirining jasariti, nizam we mukapatliri heqqide tarixiy doklat oqup, milliy armiye künining Uyghur xelqi üchün chong bir bayram bolghanliqini bildürdi.

Mezkur pa'aliyette pelsepe penlirining namzati ekberjan bawudunof barin weqesi toghrisida doklat oqudi.

Murasimgha qatnashqan dunya Uyghur qurultiyining wekili rozimuhemmed abdulbaqiyéf öz nutqida jama'etni héchqachan ümidsiz bolmasliqqa dewet qildi.

Rozimuhemmed ependi yene 4-ayning 27-küni biryussél shehiride ötküzülidighan 5 ming kishilik namayish toghrisida uchur bérip, özining shu namayishqa qatnishish niyiti bar ikenlikini izhar qildi.

Bu pa'aliyetke milliy inqilabqa qatnashqan ghazilardin peqet ablimit bekri qatniship öz eslimiliridin bir parchisini bayan qildi.

Mezkur pa'aliyet qirghizistan Uyghurlirining milliy rohini kötürüshide muhim rol oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.