Qirghizistan jumhuriyitining musteqilliq künide Uyghur sen'iti namayan qilindi

Ixtiyariy muxbirimiz féruze
2018.08.27
Qazahstandiki-atagliq-artist-Sehibe-Noruzuva.jpg Qirghizistan jumhuriyitining musteqilliq künide qazaqistandiki ataqliq artis sehide noruziwa xanim sehnide.
RFA/Féruze

Qirghizistan Uyghurliri “Ittipaq” jem'iyiti bilen qazaqistan quddus ghojamyarof namidiki jumhuriyetlik dölet Uyghur muzikiliq komédiye tiyatirining hemkarliqida bishkek shehiride, qirghizistanning musteqilliq künide, yeni 24-awghusttin 26-awghustqiche bolghan töt kün dawamida Uyghur medeniyiti we sen'iti tamashibinlargha namayan qilindi.

“Ijadiyet kéchisi” dep atalghan bu pa'aliyet qirghizistan milliy filarmoniyeside, yeni muzika-konsért zalida aliy derijide uyushturuldi. Mezkur pa'aliyetke qirghizistan xelq kéngishining re'isi tokon mamitof, qirghizistan prézidéntining jumhuriyet aliy kéngishidiki wekili qurmanbék diyqanbayif, aliy kéngeshining Uyghurlardin saylan'ghan ezasi perhat tuléndibayéf, qirghizistanda turushluq türkiye elchilikining sen'et bölümining re'isi réjep sula, gérmaniye elchilikining wekilliri, qirghizistandiki az sanliq milletler wekilliri, shundaqla köp sanda téléwiziye we gézit muxbirliri qantnashti.

Qirghizistan xelq kéngishining re'isi tokon mamitof öz nutqida qazaqistan Uyghur tiyatir kolléktiwigha qirghizistan xelqi namidin teshekkür bildürüp, kompozitor quddus ghojamiyarofning Uyghurlar arisida birinchilerdin bolup “Sowét ittipaqining xelq artisi” namigha we Uyghur milliy tiyatirining akadémiyelik tiyatir namigha érishkenlikini alahide tilgha élip ötti.

Konsért jeryanida ikki dölet arisidiki milletler ara ittipaqliqni kücheytish we az sanliq milletler sen'itini tereqqiy qildurushqa hesse qoshqanliqi üchün quddus ghojamyarof namidiki jumhuriyetlik dölet Uyghur muzikiliq komédiye tiyatirining re'isi murat exmidige qirghizistan xelq kéngishining médali teqdim qilindi, shundaqla uninggha qirghiz milliy chalghu aswapliridin qirghiz qomuzi sowghat qilindi.

Ijadiy seper jeryanida “Tebessum” hezil-külke programmisi, özbékistanning dangliq xelq artisi abduréhim exmidi tughulghanliqining 90 yilliqigha béghishlan'ghan konsért programmisi, “Nawa” Uyghur folklor ansambilining mexsus programmisi, shundaqla klassik eser “Ghérip-senem” dramisi qoyulup sen'et söyerlerning qizghin alqishlirigha érishti.

Mezkur konsértqa tamashibin qatarida qatnashqan nowopokrowka mehellining yigit béshi gheyret jahanuf Uyghur muzikiliq komédiye tiyatirining artistlirigha rehmitini bildürüp, bügünkidek Uyghurlarning ana wetinide Uyghurlar duchar boluwatqan éghir qayghuluq künlerde tiyatirning orundighan sen'et nomurliri arqiliq öz köngüllirining azraq bolsimu shadlan'ghanliqini tekitlidi.

Ziyaritimizni qobul qilghan qazaqistan jumhuriyitining xizmet körsetken artisi reyhan'gül mexpirowa uzun yillardin buyan Uyghur élidiki sen'etkarliri bilen bolghan munasiwetlirining tamamen üzülüp ketkenlikini, emma özlirining qirghizistan Uyghurliri bilen birge bolghanliqidin xushal bolghanliqini bildürdi.

Uyghur ziyaliyliri bu pa'aliyetning ikki qoshna dölettiki Uyghurlarning ittipaqlishishi we Uyghur sen'itini tereqqiy qildurushida yéngi sehipe achqanliqini éytishti. Qirghizistan Uyghurliri “Ittipaq” jem'iyiti we qazaqistan quddus ghojamyarof namidiki jumhuriyetlik dölet Uyghur muzikiliq komédiye tiyatirining arisida hemkarlishish mémorandumi imzalandi. Bu xush xewer heqqide “Ittipaq” jem'iyiti aq saqallar kéngishining ezasi mirzahekim abdulof öz héssiyatini izhar qildi.

Ziyaritimizni qobul qilghan qazaqistan quddus ghojamyarof namidiki qazaqistan jumhuriyetlik dölet Uyghur muzikiliq komédiye tiyatirining re'isi murat exmedi qirghizistandiki Uyghur sen'itining tereqqiy qilishigha yardem bérishke teyyar ikenlikini tekitlidi.

“Ijadiyet kéchisi pa'aliyiti” peqetla qirghizistan Uyghurliri emes, belki qirghizistanda yashawatqan hemme milletler üchün sen'et bayrimi boldi. “Ittipaq” jem'iyitining ma'arip kéngishining re'isi gülbostan ibdiminowa mundaq pa'aliyetlerge téximu köp yashlarni jelp qilish kéreklikini éytip, Uyghur yashlirini öz milliy sen'iti we medeniyitini hörmet qilishqa chaqirdi.

Qirghizistandiki Uyghurlar öz milliy medeniyiti, milliy sen'itige ehmiyet bermekte, lékin yash ewladlar arisida öz tili we medeniyitini bilmeslik ehwallirimu éghirlishiwatqanliqi üchün yéngi ewladlarni öz milliy tili, medeniyiti, örp-adet we sen'itini öginishke teshkillesh Uyghur jem'iyitidiki muhim mesililer qatarida qaralmaqta.

Qirghizistan hökümet sanliq melumatliri boyiche qirghizistandiki Uyghurlarning sani 60 minggha yéqin dep qariliwatqan bolsimu, lékin Uyghurlar emeliyette Uyghurlarning sanining buningdin köp ikenlikini éytishmaqta, Uyghurlar asasen bishkek shehiri we uning etrapidiki yézilargha, hem qaraqol, oshtiki qarasu, qarabalta qatarliq chong-kichik sheherlerge tarqalghan.
Bishkektin feruze teyyarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.