Rabiye qadir xanim : “Bügün ejdadlirimiz Uyghurlarning yüksek démokratik anggha ige millet ikenlikini namayan qilghan kün”

Bügün, 12 - noyabir, Uyghurlarning yéqinqi zaman tarixida, yeni 1933 - yili 11 - ayning 12 - küni we 1944 - yili 11 - ayning 12 - küni keyni - keynidin Uyghurlarning bashqa xelqler bilen birlikte ikki qétim sherqiy türkistan jumhuriyiti dep atalghan jumhuriyet élan qilin'ghan xatire künidur. Bu tarixiy kün dunyaning her qaysi jayliridiki Uyghur jama'iti teripidin xatirilenmekte.

Bu munasiwet bilen bügün biz dunya Uyghur qurultiyi re'isi rabiye qadir xanimni ziyaret qilip uning pikir - qarashlirini alduq.

Uyghur yéqinqi zaman tarixida keyni - keynidin musteqil ikki jumhuriyet élan qilin'ghan bu xatire künde ziyaritimizni qobul qilghan rabiye qadir xanim, bu künning ehmiyitige yüksek bahalar bérip “Jumhuriyet küni sherqi türkistan xelqining milliy erkinlik iradisini dunyagha jakarlighan, Uyghur millitining özini - özi bashqurush, hör yashash iqtidarigha we yüksek démokratik anggha ige millet ikenlikini namayan qilghan bir muqeddes kün” dep bildürdi we shungimu Uyghurlarning küreshchan ejdadliridin pexirlinidighan shundaqla milliy iradisining yenimu küchiyishige biwasite türtke bolup kéliwatqan bu künni eng muhim bayram süpitide tentene bilen qutluqlash arqiliq, xitaygha hemide dunyagha Uyghurlarning milliy küresh iradisidin esla waz kechmeydighanliqini,erkin yashash arzusini jakarlaydighanliqini tekitlidi.

Rabiye qadir xanim yene, sherqiy türkistan jumhuriyet künini xatirileshning ewladlargha nisbeten eng smwolluq teripi bolsa, ümid we ishench béghishlash dep alahide toxtilip “ U ikki jumhuriyitimizni her zaman yad étip turush, hemmimizning milliy hem wijdani burchidin ibaret” dédi.

Rabiye xanim pütün dunyadiki Uyghurlarni jumhuriyet bayrimini ehmiyet bilen ötküzüshke chaqiriq qilish bilen teng yene, bu xatire künlerni qandaq qilip en'enige aylandurush heqqide özining teklip pikirlirini bayan qilip: “Dunyaning herqaysi jayliridiki wetenperwer qérindashlirimiz her yildikige oxshashla bu yilmu her xil shekiller bilen ikki jumhuriyitimizni xatirilesh pa'aliyetlirini ötküzmekte, men bu xatirilesh pa'aliyetliri bilen, wetendashlirimizni, jümlidin yash nesillirimizni jumhuriyitimiz heqqide chongqur chüshenchige ige qilish kérek” dégen pikirini ilgiri sürdi we yene bir qatar qarashlirini otturigha qoydi.

U yene, bu ikki jumhuriyetning tarixi ehmiyiti tonushturush we bu jumhuriyetlerdin Uyghur xelqige miras qalghan ay yultuzluq kök bayraq, istiqlal marshi, dölet géribi we bashqilarni kéyinki ewladlirigha tonutush kéreklikini eskertti.