Amérika Uyghur jama'iti rabiye qadir xanim tewellutining 70 yilliqini qutlidi

Wirjiniye shtatida yashawatqan chonglardin biri xurshide xanim Uyghurlarning meniwi anisi rabiye qadir xanimning 70 yilliq tewelluti üchün gül sowgha qilmaqta. 2016-Yili 11-dékabir, washin'gton.

11-Dékabir küni amérikining paytexti washin'gton we uninggha yéqin jaylardiki Uyghurlar bir yerge jem bolup, Uyghurlarning meniwi anisi rabiye qadir xanim tughulghanliqining 70 yilliqini tebriklidi Hemde uninggha güldestiler teqdim qilish arqiliq özlirining rabiye xanimgha bolghan izzet hörmitini ipadilidi.

Yekshenbe kechqurun washin'gton etrapida yéngidin échilghan Uyghur réstoranliridin “Amannisa xan réstorani” qaynam tashqinliqqa tolghan bolup, top -top bolushup kéliwatqan Uyghur jama'iti bu jayda bir tentenilik murasimning bolidighanliqidin bésharet bermekte idi. Derweqe shu küni washin'gton shehiri hemde wirjiniye we mariyland shtatidin toplan'ghan Uyghur jama'iti bir yerge jem bolup, Uyghur milliy herikitining rehbiri, Uyghurlarning meniwi anisi rabiye qadir xanim dunyagha kelgenlikining 70 yilliqini tebriklimekte idi.

Pa'aliyetning eziz méhmini bolghan rabiye xanim we uning ömürlük hemrahi sidiq haji rozi dostlirining hemrahliqida murasim zaligha kirip kelgende pütün zaldikiler güldüras alqish sadaliri hemde qizghin quchaqlishishlar arqiliq hörmet bildürdi. Rabiye qadir xanimmu méhmanlar bilen bir-birlep körüshti hemde öz minnetdarliqini ipadilidi.

“Amannisa xan réstorani” bügünki tebrik soruni üchün alahide teyyarlighan yigirme nechche xil Uyghur ta'amliri rengdar we nepis shekli, shundaqla özgiche temi bilen sorunning keypiyatigha yéngiche tüs qoshqan idi. Méhmanlar öchiret bolup ta'amlargha éghiz tekkech öz'ara qizghin söhbette boldi.

Méhmanlar asasen toplinip bolghanda rabiye xanimning sheripige yighilghan méhmanlargha wakaliten uning uzun yilliq sebdashliridin yazghuchi ablikim baqi sözge chiqip rabiye xanimning hayatini qisqiche eslep ötti.

Shuning bilen birge ablikim baqi özi yézip chiqqan, rabiye xanimgha béghishlan'ghan ikki parche eserning türkiye döletlik neshriyatida türkche we Uyghurche tillarda neshr qilin'ghanliqini éytqanda pütün zaldikiler alqish yaghdurdi. Arqidinla u rabiye xanimning milletchilik we döletchilik heqqidiki nutuqliri we bayanliri asasida wujudqa chiqqan eserning rabiye xanimning tunji kitabi süpitide neshr qilin'ghanliqidin melumat bergende sorun ehli bu xosh xewerni qizghin tebriklidi.

Arqidin sorun riyasetchisi gülchéhre rabiye xanimning qedinasliridin xurshide xanimning ayallar topidiki dostlirigha wakaliten teyyarlighan güldestini sorun ehli namidin rabiye xanimgha teqdim qilidighanliqini élan qilghanda zaldikiler yene bir qétim alqish yaghdurdi. Arqidin méhmanlar bes-beste ussulgha chüshüp bu xushalliq minutliridin birlikte behrilendi.

Méhmanlar ussuldin toxtighanda rabiye xanim sözge chiqip, Uyghur jama'itining bu himmitige bolghan teshekkürini ipadilidi. U sözide bu qétimqi pa'aliyetning tarix bétide bir sehipe bolup qélishini ümid qilidighanliqini bildürdi.

Arqidinla amérika Uyghur jama'iti rabiye xanimning köp yilliq Uyghur dawasigha singdürgen ejri, shundaqla Uyghur dawasining xelq'aralishishida oynighan hel qilghuch roligha teshekkür bildürüsh yüzisidin uninggha lewhe teqdim qildi. Nepis lewhe yüzige chékilgen Uyghurche tékist ünlük oqulghanda sorun ehli yene bir qétim hayajan'gha chömdi.

Bu qétimqi qutluq sorun'gha qedem teshrip qilghan sidiq haji rozimu öz nöwitide söz élip Uyghur dawasining müshküllükke we riyazetke tolghan bir yol bolsimu kishi pexirlen'güdek sherepke ige ikenlikini tekitlidi.

Axirida sorun ehli rabiye qadir xanimning 70 yashliq tewellutigha atap teyyarlighan chong tort élip kélindi, Uyghur jama'iti özlirining rabiye xanimgha bolghan semimiy tileklirini bildürgech bes-beste uning bilen xatire süretke chüshti. Pa'aliyet qizghin tilekler we semimiy xoshlishishlar ichide köngüllük axirlashti.