Ressam merwayit xanim yene bir netijisi bilen Uyghurlarni iptixarlandurdi

Muxbirimiz gülchéhre
2018-02-13
Élxet
Pikir
Share
Print
Ressam merwayit hapiz xanim myunxénda ötküzülgen zamandash ressamlar jem'iyiti qurulghanliqining 150 yilliq toyida. 2018-Yili 1-féwral. Myunxén, gérmaniye.
Ressam merwayit hapiz xanim myunxénda ötküzülgen zamandash ressamlar jem'iyiti qurulghanliqining 150 yilliq toyida. 2018-Yili 1-féwral. Myunxén, gérmaniye.
Social Media

"Myunxén zamandash ressamlar jem'iyiti" qurulghanliqining 150 yilliqi munasiwiti bilen ötküzülgen may boyaq resimler körgezmisi myunxéndiki misir muzéyida dawam qilmaqta.

Tonulghan Uyghur ressam merwayit hapiz xanimmu bu körgezmige tallan'ghan 100 ressam qataridin orun alghan. Uning "Qedimiy hoyla" namliq bir parche may boyaq esiri körgezmige qoyulghandin sirt, özimu mezkur jem'iyetning chong toyigha atalghan zhurnalda tonushturulghan.

1868-Yili gérmaniyening myunxén shehiride qurulghan "Myunxén zamandash ressamlar jem'iyiti" gérmaniye we yawropa güzel sen'et saheside tesiri bir qeder chong bolghan teswiriy sen'etchiler jem'iyiti.

Jem'iyetning tor bétidiki uchurlargha qarighanda, uning qurulghanliqining 150 yilliq toyi munasiwiti bilen uyushturulghan medeniyet pa'aliyetliri ichide tallan'ghan ressamlarning may boyaq eserliri körgezmisi asasliq pa'aliyet hésablinidiken.

Körgezmining échilish murasimi 1-féwral daghdughiliq ötküzülgen bolup, körgezme 25-féwralghche dawam qilidiken.

Gérmaniyediki tonulghan Uyghur ressam merwayit hapiz xanimmu özining "Qedimiy hoyla" namliq esiri bilen mutexessislerning tallishidin ötken yüz ressamning 161 parche esiri qoyulghan mezkur körgezmidin orun alghan. Bu, uning mezkur jem'iyetning bu xildiki körgezmilirige 12-qétim qatnishishi bolup hésablinidiken.

Bu munasiwet bilen ziyaritimizni qobul qilghan merwayit hapiz xanim, bu körgezmining intayin ehmiyetlik ikenlikini, özining bir parche esirining bu körgezmige qoyulghandin sirt, jem'iyetning 150 yilliqigha béghishlan'ghan katalogidimu tonushturulghanliqini, buni özining hazirghiche bolghan kespiy hayatidiki iptixarlinarliq bir netije, dep qaraydighanliqini bildürdi.

U yene Uyghur xelqi éghir künlerni béshidin kechürüwatqan mushundaq bir peytte qolgha keltürgen bu netijisining "Uyghurlarning yarilan'ghan qelbige ilham bexsh étishini ümid qilidighanliqi" ni bildürdi.

Qabiliyetlik ressam merwayit xanimning bu netijisi ijtima'iy taratqulardimu tarqilip, Uyghurlarni nahayiti söyündürmekte.

Sen'et sahesi zor riqabetke tolghan yawropa jem'iyitide bir ressamning étirap qilinishqa érishishining heqiqiy talant we özgichilik telep qilidighanliqi sen'etkarlar teripidin yekünlen'gen qarashtur.

Bu heqte toxtalghan shiwétsiyediki Uyghur ressam nijat hoshur ependi kesipdishi merwayit xanimning tirishchanliqi we kesipke bolghan izchilliqigha qayil ikenlikini bildürdi. U, resim sen'iti alahide tereqqiy qilghan yawropada, bolupmu gérmaniyedek güzel sen'et tarixi uzun bir dölettiki bundaq nopuzluq jem'iyetning körgezmisige tallinishning her qandaq bir ressamgha nisbeten iptixarlinarliq bir ish, ikenlkini étti.

Nijat hoshur ependi yene bu xildiki körgezmilerge merwayit xanimning eserlirining tallinishigha "Uning resimliridiki chongqur pelsepiwilik, xasliq we özgiche ipadilesh usuli seweb boldi" dep qaraydighanliqini bildürdi.

U yene Uyghurlarning öz millitidin yétiship chiqiwatqan güzel sen'etchilerni heqiqiy yosunda qollishning muhimliqini eskertip: "Her qandaq ressam öz xelqining qollishidin tapqan ilhamni héch yerdin tapalmaydu" dédi.

Toluq bet