Exmetjan hashiri türk dunyasi drama yézish musabiqiside birinchilikke érishti

Türkiye jumhuriyiti kéyinki 25 yildin béri ottura asiya türkiy jumhuriyetliri we türkiy milletliri bilen bolghan munasiwitini kücheytish üchün her xil edebiy pa'aliyetler uyushturmaqta.

Bügün türkiye medeniyet we sayahet ministirlikining qollishi bilen yawro-asiya yazghuchilar birliki ötküzgen, 2-nöwetlik xelq'araliq “Qorqut ata drama yézish musabiqisi” da netije qazan'ghanlargha mukapat tarqitish musabiqisi ötküzüldi. Ezerbeyjan, rusiye fédératsiyesi, moldowa, qazaqistan, iran, iraq we türkmenistan qatarliq dölet hem rayonlardin 48 yazghuchi qatnashqan musabiqide Uyghur yazghuchi exmetjan hashirining “Charbagh” namliq drama esiri birinchilikke érishken.

Türkiyelik yazghuchi lütfi shaxsuwaroghluning drama esiri ikkinchilikke, ezerbeyjandin perwin nuraliyéwa xanimning drama esiri üchinchilikke érishken. 19-Dékabir enqerede ötküzülgen mukapat tarqitish murasimida exmetjan hashirining médalini parlamént ezasi, sabiq medeniyet we sayahet ministiri nebi awji berdi. Murasimgha türkiye medeniyet we sayahet ministirining mu'awini güler yayman, yawro-asiya yazghuchilar birliki re'isi yaqup ömeroghlu qatarliqlar qatnashti we söz qildi.

Parlamént ezasi, sabiq medeniyet we sayahet ministiri nebi awji ependi “Qorqut ata drama yézish musabiqisi”gha eser ewetken kishilerge rehmet éytqandin kéyin mukapatqa érishkenlerni tebriklep mundaq dédi: “Alim we peziletlik kishilikke ige bolghan qorqut atani rehmet we minnetdarliq bilen esleymen. Shundaqla 2-nöwetlik xelq'araliq drama yézish musabiqisige qatnashqan eser bahalash komitétigha we eser ewetken hem drama eserliri mukapatqa érishken yazghuchilarni tebrikleymen.”

Bu qétimqi drama yézish musabiqisige 48 kishi eser ewetken bolup, bularning ichidin Uyghur yazghuchi exmetjan hashiri yazghan “Charbagh” namliq eser birinchi bolup bahalan'ghan. Yighin riyasetchisi exmetjan hashirining médalini parlamént ezasi nebi awjining béridighanliqini élan qilghanda zalda güldüras alqish sadasi yangridi.

Arqidin qazaqistan yazghuchilar jem'iyitining ezasi, tonulghan yazghuchi exmetjan hashiri ependi söz qilip, sherqiy türkistan we qazaqistanda yashawatqan 20 milyon Uyghur xelqige türkiye jumhuriyitining her zaman medet bérip kéliwatqanliqini tekitlidi.

Exmetjan hashiri murasimda qilghan nutqida Uyghurlarning tarixta büyük miraslarni yaratqan büyük xelq ikenlikini, özige “Qorqut ata drama mukapati” ni bergen yawro-asiya yazghuchilar jem'iyitige pütün Uyghur xelqi namidin rehmet éytidighanliqini bayan qildi.

Tonulghan yazghuchi exmetjan hashiri ependi özining bu mukapatqa érishkenliki toghrisidiki xewer tarqalghandin kéyin qazaqistandiki Uyghur we qazaq ziyaliylirining intayin xursen bolghanliqini bayan qildi.

19-Dékabir küni türkiyening paytexti enqerediki xelq'ara türkiy milletler medeniyet -sen'et teshkilatining zalida ötküzülgen murasimgha “Qorqut ata drama yézish musabiqisi” da derijige érishken yazghuchilardin sirt türkiyening herqaysi jayliridin kelgen ziyaliylarmu ishtirak qildi. Istanbuldiki bilge uniwérsitéti oqutquchisi doktor murat orxun ependi exmetjan hashiri ependining bu mukapatqa érishkenlikidin qattiq pexirlen'genlikini bayan qildi.

Qazaqistanning almuta shehiride turushluq tonulghan yazghuchi exmetjan hashiri yazghan “Charbagh” namliq drama esiride 1941-1945-yilliridiki sowét-gérman urushi mezgilide sowét hökümitining ziyankeshlikige uchrap, sibiryege sürgün qilin'ghan, almuta shehiri yénigha jaylashqan “Charbagh” yézisidiki bir Uyghur momayning hayati bayan qilin'ghan. Bu drama yéqinda qazaqistan Uyghur tiyatiri teripidin sehnige qoyulidiken.