“Türkiy tillar diwani” dunya medeniyet mirasi tizimlikige sunulmaqchi

Ixtiyariy muxbirimiz arslan
2014-02-13
Share
turkiy-tillar-divani-305.jpg Türkiy tillar diwani
RFA

Yéqinda türkiye axbaratlirida, türkiyediki munasiwetlik da'irilerning “Türkiy tillar diwani” ni birleshken dölet teshkilati ilim – pen we ma'arip teshkilati chiqiridighan dunya medeniyet mirasi tizimlikige kirgüzüsh üchün heriket qiliwatqanliqi bildürüldi.

Birleshken dölet teshkilati ilim - pen, ma'arip, medeniyet teshkilati (UNESCO) ning türkiye milliy komitéti re'isi öjal oghuz ependi, anadoliye agéntliqigha bergen bayanatida, türkiyedin bu yil türkiy tillar diwanining, birleshken dölet teshkilati ilim - pen, ma'arip, medeniyet teshkilati (UNESCO) teripidin dunya medeniyet mirasi tizimlikige kirgüzülüshi üchün iltimas sunulidighanliqini bildürdi.

Öjal oghuz ependi, 1072‏-1074‏- yillar arisida mexmut qeshqiri teripidin yézilghan “Türkiy tillar diwani” ning tilshunaslar üchün intayin ehmiyetlik eser ikenlikini bildürdi we: “Türkiy tillar diwani” dégen texminen 80 dölet we rayon'gha yéqindin alaqidar bolghan bir medeniyet xezinisi démektur, dédi.

Anadoliye agéntliqining xewiride bildürüshiche, öjal oghuz ependi, “Türkiy tillar diwani” bilen qeysiri kültepedin qézip chiqirilghan we mix yéziqlar bilen asurja yéziqida yézilghan kültepe taxtilirinimu dunya medeniyet mirasliri qatarigha kirgüzüsh üchün teyyarliq qilmaqta iken.

Öjal oghuz ependi mundaq dédi: eng muhimi bular insaniyetning ortaq qimmetlik yadikarliqliri we türkiyege a'it mejmu'edur, bular insaniyet bilen qulay halda yüz körüshüshi kérek.

Igilinishiche öjal oghuz ependi, bu her ikki eserge alaqidar höjjetlerni yézish, teyyarlash ishlirini bashlighan.

31‏- Martqiche bolghan ariliqta birleshken dölet teshkilati ilim - pen, ma'arip, medeniyet teshkilati (UNESCO) ning merkizige bérip “Türkiy tillar diwani” we kültepe taxtiliri qatarliq eserlerning dunya medeniyet mirasliri tizimlikige élinishi üchün iltimas sunulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet