Уйғурлар көрсәткән һөрмәт түрк сәнәткарни йиғлатти

Уйғур диярини зиярәт қилған түрк дунясида тонулған даңлиқ сәнәтчи бунямин ақсунгур әпәнди зиярәт тәсиратини аңлатти. 2015-Йили 14-ноябир, истанбул.

14-Ноябир шәнбә күни, мәркизи истанбулға җайлашқан “түрк дуняси тәтқиқатлири фонди” ниң уюштуруши билән “шәрқий түркистан тәсирати” дегән темида бир йиғин өткүзүлди. Йиғинда уйғур диярини зиярәт қилған түркийә радио-телевизийә идариси телевизийә риясәтчиси, шундақла түрк дунясида тонулған даңлиқ сәнәтчи бунямин ақсунгур әпәнди зиярәт тәсиратини аңлатти.

Йиғинда бунямин ақсунгур әпәнди алди билән уйғур сәнәтчи сәнубәр турсунниң “салам хәлқим” дегән нахшисини орунлиди. Кейин өзиниң 48 йилдин буян уйғур диярини зиярәт қилиш арзуси қурбан һейтта реаллиққа айланғанлиқидин өзиниң интайин хушал болғанлиқини вә мәмнунийитини ипадилиди.

Бунямин ақсүнгүр әпәнди үрүмчи, турпан, ақсу, корла, қәшқәр, атуш, хотән қатарлиқ шәһәрләрни зиярәт қилиш җәрянида, уйғурларниң өтмүштин бүгүнгичә тарихи, җуғрапийиси, тили, әдәбият сәнити, мәдәнийити вә иҗтимаий һаяти шундақла иқтисадий әһвали тоғрисида көргән билгәнлирини өзи тартқан рәсимләр арқилиқ тәсирлик усулда аңлатти.

Бунямин ақсунгур әпәнди сөзидә, уйғурларниң наһайити меһмандост хәлқ икәнликини, үрүмчидә бир қисим сәнәтчи уйғурларниң уни қизғин күтүвалғанлиқини, уни наһайити һөрмәт қилип көңүллүк меһман қилғанлиқини, шәһәрләрни айлиништа өзини ялғуз қоймастин вә һечқандақ чиқим қилдурмастин бешида көтүрүп зиярәт қилдурғанлиқини, тамақ зияпәтләрдә, сөһбәтләрдә һөрмәт билдүргәнликидин қаттиқ тәсирләнгәнликини билдүрди вә қошумчә қилип: “мән ақсунгүр болғанлиқим үчүн әмәс, бир түрк болғанлиқим үчүн уйғур қериндашлирим түркийәгә болған һөрмитини маңа көрсәтти. Һал бундақ икән, бизниң җумһур рәисимизгә көп вәзипә чүшиду” деди.

Бунямин ақсунгур әпәнди, үрүмчидә мәрһум абдуреһим өткүр, зордун сабирниң, турпанда абдухалиқ уйғурниң қәбрисини, ақсуға берип лутпулла мутәллипниң қәбрисини, атушта сутуқ буғрахан қәбрисини, қәшқәрдә мәһмут қәшқири вә йүсүп хас һаҗипниң қәбрилирини зиярәт қилғандики туйғулирини наһайити тәсирлик бир усулда ипадилиди вә у қәбриләрниң бешида чүшкән хатирә рәсимлирини чоң екран арқилиқ көрсәтти.

Бунямин ақсунгур әпәнди, тәсиратлирини сөзләш җәрянида уйғурларниң көрсәткән меһмандост вә қериндашлиқ муамилисини ипадиләп көз яшлирини туталмиди вә йиғин әһлиниңму көзлирини нәмләтти.

Бунямин ақсунгүр әпәнди ахирида, абдуреһим һейтниң “учрашқанда” дегән нахшиси билән абдулла абдуреһимниң “җанан уйқуда” дегән нахшисини дутар билән орунлап йиғин әһлини һаяҗанға салди.

Бунямин ақсунгур әпәнди түрк дунясиниң сәнәтлирини яхши көридиған вә т р т телевизийә екранлирида уйғурчә, қазақчә, қирғизчә вә өзбекчә нахша оқуп, саз челип келиватқан түрк сәнәтчи болуп, униң йеқиндин буян раваб вә дутар билән орунлиған уйғурчә нахшилири түркийәдә алқишқа еришип кәлмәктә.

Биз бу йиғин тоғрисида пикир-қарашлирини елиш үчүн йиғинға қатнашқан шәрқий түркистан вәхпиниң сабиқ рәиси һамут көктүрк әпәнди билән сөһбәт елип бардуқ.

Һамут көктүрк әпәнди: “бу хил йиғинларниң көпләп ечилиши ‛шәрқий түркистан мәсилиси‚ үчүн интайин пайдилиқ, болупму бунямин ақсунгур әпәндигә охшаш түркийәдә тәсири бар кишиләрниң шәрқий түркистанни зиярәт қилип уйғурларниң һәқиқий әһвалини аңлитиши наһайити муһим паалийәт болуп һесаблиниду” деди.