Uyghurlar körsetken hörmet türk sen'etkarni yighlatti

• Ixtiyariy muxbirimiz arslan
  2015-11-18

14-Noyabir shenbe küni, merkizi istanbulgha jaylashqan “Türk dunyasi tetqiqatliri fondi” ning uyushturushi bilen “Sherqiy türkistan tesirati” dégen témida bir yighin ötküzüldi. Yighinda Uyghur diyarini ziyaret qilghan türkiye radi'o-téléwiziye idarisi téléwiziye riyasetchisi, shundaqla türk dunyasida tonulghan dangliq sen'etchi bunyamin aqsun'gur ependi ziyaret tesiratini anglatti.

Yighinda bunyamin aqsun'gur ependi aldi bilen Uyghur sen'etchi senuber tursunning “Salam xelqim” dégen naxshisini orunlidi. Kéyin özining 48 yildin buyan Uyghur diyarini ziyaret qilish arzusi qurban héytta ré'alliqqa aylan'ghanliqidin özining intayin xushal bolghanliqini we memnuniyitini ipadilidi.

Bunyamin aqsün'gür ependi ürümchi, turpan, aqsu, korla, qeshqer, atush, xoten qatarliq sheherlerni ziyaret qilish jeryanida, Uyghurlarning ötmüshtin bügün'giche tarixi, jughrapiyisi, tili, edebiyat sen'iti, medeniyiti we ijtima'iy hayati shundaqla iqtisadiy ehwali toghrisida körgen bilgenlirini özi tartqan resimler arqiliq tesirlik usulda anglatti.

Bunyamin aqsun'gur ependi sözide, Uyghurlarning nahayiti méhmandost xelq ikenlikini, ürümchide bir qisim sen'etchi Uyghurlarning uni qizghin kütüwalghanliqini, uni nahayiti hörmet qilip köngüllük méhman qilghanliqini, sheherlerni aylinishta özini yalghuz qoymastin we héchqandaq chiqim qildurmastin béshida kötürüp ziyaret qildurghanliqini, tamaq ziyapetlerde, söhbetlerde hörmet bildürgenlikidin qattiq tesirlen'genlikini bildürdi we qoshumche qilip: “Men aqsun'gür bolghanliqim üchün emes, bir türk bolghanliqim üchün Uyghur qérindashlirim türkiyege bolghan hörmitini manga körsetti. Hal bundaq iken, bizning jumhur re'isimizge köp wezipe chüshidu” dédi.

Bunyamin aqsun'gur ependi, ürümchide merhum abduréhim ötkür, zordun sabirning, turpanda abduxaliq Uyghurning qebrisini, aqsugha bérip lutpulla mutellipning qebrisini, atushta sutuq bughraxan qebrisini, qeshqerde mehmut qeshqiri we yüsüp xas hajipning qebrilirini ziyaret qilghandiki tuyghulirini nahayiti tesirlik bir usulda ipadilidi we u qebrilerning béshida chüshken xatire resimlirini chong ékran arqiliq körsetti.

Bunyamin aqsun'gur ependi, tesiratlirini sözlesh jeryanida Uyghurlarning körsetken méhmandost we qérindashliq mu'amilisini ipadilep köz yashlirini tutalmidi we yighin ehliningmu közlirini nemletti.

Bunyamin aqsun'gür ependi axirida, abduréhim héytning “Uchrashqanda” dégen naxshisi bilen abdulla abduréhimning “Janan uyquda” dégen naxshisini dutar bilen orunlap yighin ehlini hayajan'gha saldi.

Bunyamin aqsun'gur ependi türk dunyasining sen'etlirini yaxshi köridighan we t r t téléwiziye ékranlirida Uyghurche, qazaqche, qirghizche we özbékche naxsha oqup, saz chélip kéliwatqan türk sen'etchi bolup, uning yéqindin buyan rawab we dutar bilen orunlighan Uyghurche naxshiliri türkiyede alqishqa ériship kelmekte.

Biz bu yighin toghrisida pikir-qarashlirini élish üchün yighin'gha qatnashqan sherqiy türkistan wexpining sabiq re'isi hamut köktürk ependi bilen söhbet élip barduq.

Hamut köktürk ependi: “Bu xil yighinlarning köplep échilishi ‛sherqiy türkistan mesilisi‚ üchün intayin paydiliq, bolupmu bunyamin aqsun'gur ependige oxshash türkiyede tesiri bar kishilerning sherqiy türkistanni ziyaret qilip Uyghurlarning heqiqiy ehwalini anglitishi nahayiti muhim pa'aliyet bolup hésablinidu” dédi.