Erkin ekrem sherqiy türkistan islam jumhuriyitining istratégiyilik muhimliqi témisida léksiye sözlidi

Doktor erkin ekrem léksiyedin kéyin gollandiyediki Uyghurlar bilen xatire süretke chüshti. 2013-Yili 17-noyabir, gollandiye.

17‏-Noyabir gollandiyediki Uyghurlar sherqiy türkistan islam jumhuriyitining qurulush hem yéqilishi we sherqiy türkistanning herjehettiki istratégiyilik muhimliqigha a'it uchurlar mezmun qilin'ghan léksiyeni anglidi.

Bu léksiyeni alahide teklip bilen kelgen, türkiyede turushluq istratégiye mutexessisi proféssor doktor erkin ekrem ependi teqdim qildi. Bu pa'aliyetni gollandiyediki yawropa sherqiy türkistan ma'arip jem'iyiti teshkillidi.

Pa'aliyet shu yer waqti chüshtin kéyin 1 yérimde kichik oghlan abdurahmanning qur'an kerim tilawiti bilen bashlandi. Andin jem'iyet mes'uli obulqasim ependi qedem teshrip qilghan méhmanlar we erkin ekrem ependige rehmitini bildürüp söz qildi.

Proféssor doktor erkin ekrem ependining sherqiy türkistan islam jumhuriyitining qurulush hem yéqilishigha alaqidar tunji léksiyeside, sherqiy türkistan islam jumhuriyitining qurulush harpisidiki ichki ‏- tashqi, ijabiy we selbiy amillar, shu chaghdiki xelq'ara weziyet, purset we amet, imkan we qismetler ipade qilin'ghan achchiq kechmishlerge yoshurun'ghan oyunlarning mahiyiti yorutulup, sherqiy türkistan xelqining eyni chaghdiki teqdiri, chong shahmat taxtisidiki bir tal uruqchigha oxshap qalghanliqi bilen xulasilendi.

Namaz we tamaqtin kéyin so'allargha jawab bérish teriqiside dawam qilghan léksiyede, gollandiyediki noghay türkliri jem'iyitining wekili sherqiy türkistanning bügünki tetür qismitige eng chong ziyan salghuchi qaysi küch dep soridi. Erkin ekrem ependi buninggha qarita ochuq qilip, rusiye dep jawab berdi.

Proféssor doktor erkin ekrem ependi sherqiy türkistanning herjehettiki istratégiyilik muhimliqigha a'it léksiyede, sherqiy türkistanning jughrapiyiwi, iqtisadiy, tashqi alaqe, quruqluq we hawa yolliri qatnishi, bügünki tengpung küchlerning küch élishish nuqtisidiki roli qatarliq türlük sahelerde tutqan ornining intayin muhim ikenlikini bayan qildi.

7 Sa'etke yéqin dawam qilghan mezkur pa'aliyet ishtirakchiliri bügünki bu léksiyening qimmitige yuqiri baha berdi. Pa'aliyet axirlashqanda köpchilik birlikte xatire resimge chüshti. Proféssor doktor erkin ekrem ependi ziyaritimizni qobul qilip bu qétimqi léksiye bérish pa'aliyitide, gollandiyediki Uyghurlarning qizghinliqi we intilish rohidin razi bolghanliqini bildürdi.