"Ürümchi réstorani" rottérdam kochilirida Uyghur medeniyitini namayan qilmaqta

Ixtiyariy muxbirimiz ekrem
2018-05-28
Share
urumchi-restorani-leghmen.jpg "Ürümchi réstorani" rottérdam sheherlik hökümetning telipi boyiche sheher merkizidiki awat bir kochida Uyghur ta'amlirini neq meydanda körgezme qildi. 2018-Yili 27-may, gollandiye.
RFA/Ekrem

Gollandiyening rottérdam shehiridiki "Ürümchi réstorani" gherbiy yawropada Uyghur yémek-ichmek medeniyitini tonushturushta közneklik rol oynimaqta.

27-May küni gollandiyening rottérdam shehiridiki "Ürümchi réstorani" rottérdam sheherlik hökümetning telipi boyiche sheher merkizidiki awat bir kochida Uyghur ta'amlirini neq meydanda körgezme qilip, kishilerning yaxshi bahasigha érishken.

"Ürümchi réstorani" ning xojayini zeynidin ependining bergen melumatlirigha asaslan'ghanda, yüzdin artuq yerlik gollandiyelikler bu qétimqi Uyghur yémek-ichmek medeniyiti körgezmisige daxil bolghan. Ular neq meydanda Uyghurche leghmen, polu, kawap qatarliq en'eniwi ta'amlargha éghiz tégip, öz memnuniyetlirini izhar qilishqan.

Zeynidin tursunning inisi qehriman tursunning bildürüshiche, Uyghur yémek-ichmek körmezme sorunigha qedem teshrip qilghan yerlik gollandiyelikler Uyghur ta'amlirining hazirlinish jeryanini neq meydanda téléwizor ékrani arqiliq körgen. Ular Uyghur ta'am medeniyiti we Uyghur millitining kimliki heqqide köpligen so'allarni sorashqan.

Zeynidin tursunning ayali rahile xanim neq meydanda leghmen sozush mahariti körsitip, etraptiki kishilerni heyran qaldurghan. Neq meydanda közitip turghan yerlik ahaliler leghmenning étilish jeryanini körüsh bilen bir waqitta yene bu xil ta'am medeniyitining igisi bolghan Uyghurlar toghriliq köpligen chüshenchilerge érishken.

"Ürümchi réstorani" bundin 3 yil burun gollandiyediki Uyghur pa'aliyetchilerdin zeynidin tursun ependi teripidin rottérdam shehiride échilghan. Ilgiri bu réstoran namida Uyghur kimliki we medeniyitini tonutush mezmun qilin'ghan köpligen ijtima'iy we medeniyet pa'aliyetliri élip bérilghan. Zeynidin ependi bu heqte ziyaritimizni qobul qilip, bundin kéyin mezkur réstoranni sehne qilip, kölimi téximu zor bolghan pa'aliyetlerge hazirliq qiliwatqanliqini eskertti.

Rahile xanim bu qétimliq Uyghur yémek-ichmek medeniyiti körgezmiside Uyghur en'eniwi ta'amlirini teyyarlashtiki alahide mahariti bilen yerlik gollandiyeliklerni heyran qaldurupla qalmay, belki yerlik gollandiyeliklerning Uyghur millitige we ularning ta'am medeniyitige bolghan qiziqishliridin öziningmu heyran bolghanliqini tilgha aldi. Qehriman tursun ependi bu qétimqi yémeklik körgezmisining Uyghur medeniyitini namayan qilipla qalmay, belki yene Uyghur tarixi we Uyghurlarning bügünki échinishliq weziyitini anglitishta bir alahide köznek bolghanliqini tekitlidi.

Igilishimizche, "Ürümchi réstorani" ning xojayini zeynidin tursun ependi öz nöwitide dunya Uyghur qurultiyi medeniyet komitétining mudiri we xelq'ara kechürüm teshkilatining ezasi iken. U xelq'ara kechürüm teshkilatining rottérdam shehiridiki xadimliri bilen zich hemkarliship, yillardin buyan Uyghurlar mesilisini gollandiye xelqige anglitish yolida bir qatar tirishchanliqlarni körsitip kelmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet