Hüseyin yildirim ependi "Pütün dunyadiki Uyghurlarni Uyghur sen'et féstiwaligha teklip qilimiz"

Ixtiyariy muxbirimiz erkin tarim
2016-08-31
Élxet
Pikir
Share
Print
Türkiyening sherqiy shimaligha jaylashqan amasya wilayitining Uyghur nahiyiside her yili ötküzülüp kéliwatqan sen'et féstiwalining 18-nöwetlikining elani.
Türkiyening sherqiy shimaligha jaylashqan amasya wilayitining Uyghur nahiyiside her yili ötküzülüp kéliwatqan sen'et féstiwalining 18-nöwetlikining elani.
RFA/Erkin Tarim

Türkiyening sherqiy shimaligha jaylashqan amasya wilayitining Uyghur nahiyiside her yili ötküzülüp kéliwatqan sen'et féstiwalining 18-nöwetliki qurban héytning 3-küni ötküzülmekchi.

Bu féstiwalning uyushturush komitéti mes'uli hüseyin yildirim ependi ziyaritimizni qobul qilip, en'eniwi halgha kelgen Uyghur sen'et féstiwalining 18-nöwetlikining 14-awghust küni Uyghur nahiyeside ötküzülidighanliqini, dunyaning her qaysi jaylirida yashawatqan Uyghurlarning kélip qatnishishini qarshi alidighanliqini éytti.

Etigendin axshamghiche dawamlishidighan pa'aliyetke amasya walisi, sheher bashliqi, her derijilik kadirlar, parlamént ezaliri, ammiwi teshkilat mes'ulliri we yéqin kentlerning mes'ulliri we istanbuldiki Uyghur teshkilatliri teklip qilin'ghan. Bu sen'et féstiwalida türkiyede tonulghan naxshichi güljihan qoch xanim, alperen madal ependi qatarliqlardin sirt amasya rayonida tonulghan sen'etchilermu naxsha orunlaydiken.

Biz 18 yildin béri Uyghur nahiyeside ötküzülüp kéliwatqan féstiwalning 18-nöwetliki toghrisida téximu tepsiliy melumat igilesh üchün Uyghur yézisining medeniyet miraslirini qoghdash we hemkarliq jem'iyiti re'isi hüseyin yildirim ependi we burun bu féstiwalgha ishtirak qilghan proféssor doktor alimjan inayet we hamut göktürk ependiler bilen téléfon söhbiti élip barduq.

Hüseyin yildirim ependi 18-nöwetlik sen'et féstiwalini ötküzüshtiki meqsetning yash ewladlargha Uyghur örp-adetlirini we kültürini ögitish ikenlikini tekitlep mundaq dédi: "18-Nöwetlik kültür féstiwali her zamandikige oxshashla amasya wilayitige qarashliq Uyghur kentimizde ötküzülidu. Bu pa'aliyetni ötküzüshtiki meqsitimiz, kültürimizni yéngi ewladlargha ögitish, sirtta turuwatqan Uyghurlarni bir jaygha jem qilish, hemkarlishish éngini östürüshtin ibaret. Féstiwalda sen'etchiler oyun qoyidu, yéza xelqi qol sen'et buyumlirini satidu. Örp-adetlirimiz körsitilidu."

Hüseyin yildirim ependi sherqiy türkistanliq Uyghurlarningmu féstiwalgha kélip qatnishishini ümid qilidighanliqini bayan qilip mundaq dédi: "Bu féstiwalgha memlikitimizning her teripidin kishiler kélip qatnashsa bolidu. Sherqiy türkistandiki qérindashlirimiz kélip qatnashsimu bolidu. Sizgimu melum bolghinidek 8-9 ay burun, 2015-yilining axirida Uyghurlarning tarixi toghrisida ilmiy muhakime yighini chaqirghan iduq. Bu yighinda, Uyghurlarning chinggizxan armiyesi bilen birlikte anatoliyege kelgenliki, eratna Uyghur dölitini qurghanliqi, türkiyening qaysi rayonlirigha jaylashqanliqi otturigha qoyulghan idi. Biz sherqiy türkistandiki, türkiyediki we dunyaning herqaysi jaylirida turuwatqan Uyghurlarning féstiwalgha ishtirak qilishini ümid qilimiz we kütimiz."

Ége uniwérsitéti oqutquchisi proféssor oktor alimjan inayet ependi her yili ötküzülüp kéliwatqan sen'et féstiwalining türkiyege qedimde kelgen Uyghurlar bilen yéngi chiqqan Uyghurlarni, "Wetendiki Uyghurlar bilen chet'eldiki Uyghurlarning meniwi rishtini kücheytish üchün zor paydiliq ikenliki"ni tekitlidi.

Sherqiy türkistan wexpining sabiq re'isi hamut göktürk ependi amasya wilayitidiki Uyghurlarning özlirining Uyghur ikenlikini ilgiri sürüp, tarix toghrisida yighinlar échiwatqanliqini, féstiwal ötküzüwatqanliqini, buninggha türkiyediki Uyghurlarning aktip qatnishishi kéreklikini bayan qildi.

Hamut göktürk ependi türkiye amasya wilayitidiki Uyghurlar bilen sherqiy türkistandiki Uyghurlarning oxshash ikenlikini, bu féstiwalning Uyghur dewasi üchün paydiliq ikenlikini bayan qildi.

Amasya wilayitidiki Uyghurlar tarixi menbelerge asaslan'ghanda, 13-esirning axirida türkiye zéminigha kelgen iken. Burun 450 etrapida a'ile turuwatqan Uyghur dep atalghan jay, 1990-yillarning bashlirida nahiye qilip békitilgen bolup, nopusining aziyip kétishi bilen nahiye bolush salahiyiti élip tashlan'ghan. Uyghur sen'et féstiwali 1999-yilidin tartip ötküzülmekte bolup, amérika, gérmaniye we enqerediki bezi Uyghurlar féstiwalgha qatnashqan.

Toluq bet