Istanbuldiki pa'aliyette 10 ming kishige polu ziyapiti bérildi

Zeytinburnu xelq meydanida ötküzülgen yerlik milliy tamaq temliri we radiyo féstiwalining axirqi küni 10 ming kishilik polu pishurulup tarqitildi. 2016-Yili may, istanbul.

Uyghur ta'amlirigha türkler qiziqishqa bashlidi. Milliy ta'amlardin sewzilik polu lezzetlik temi bilen türkler arisida türkistan polusi dégen nam bilen tonulushqa bashlidi. Zeytinburnu sheherlik hökümetning uyushturushi bilen 15- may yekshenbe küni zeytinburnu xelq meydanida ötküzülgen yerlik milliy tamaq temliri we radiyo féstiwalida 10 ming kishige polu ziyapiti bérildi.

Bu féstiwalgha nechche minglighan kishi qatnashqan bolup, zeytinburnu sheher bashliqi murat aydin öz qoli bilen polu usup tarqatti.

Féstiwal bir qanche kün dawam qilghan bolup her xil yerlik milliy tamaqlar heqsiz tarqitildi. Köpligen radiyo we téléwiziye programmichiliri neq meydandin programma tarqatti. Bu toghrida türkiye metbu'atlirida, 20 ming kishige türkistan polusi tarqitildi dégendek témilarda köplep xewerler tarqitildi.

Féstiwalning axirqi küni nechche yüz kilogramliq xuruch bilen 10 ming kishilik polu pishurulup tarqitildi. Poluning temini tétishqa qiziqqan wetendashlar nechche on métir uzunluqta qatargha tizilip issiq hawada saqlidi. Féstiwalda chong qazanning béshigha kelgen murat aydin özige hediye qilin'ghan chimen doppa we uzun chapanni kiygen halda polu usup wetendashlargha öz qoli bilen tarqatti.

Sheher bashliqi murat aydin muxbirlarning ziyaritini qobul qilip bu pa'aliyet toghrisida toxtaldi we zeytinburnuning démografik qurulmisining nahayiti körkem ikenlikini bildürüp mundaq dédi: “Türk dunyasidin, sherqiy türkistan, afghanistan, qazaqistan, özbékistan, qirghizistan, türkmenistandin kélip zeytinburnugha orunlashqan we bu yerlerni yurt tutup yashighan hemsheherlirimiz bar. U wetendashlirimiz özliri bilen birge tamaq medeniyiti we örp - adetlirinimu birge élip keldi. Türkistan ta'amliri dégen haman tunji bolup eqilge kélidighan türkistan polusidur. Biz bu lezzetlik poluning temini zeytinburnu xelqigimu tétitishni xaliduq. Türkistan polusi, sewze, gösh we asiyadin keltürülgen gürüch bilen pishurulidighan lezzetlik bir tamaq.”

Murat aydin özi kiyiwalghan ton chapan bilen chimen doppa toghrisida muxbirning sorighan so'aligha jawab bérip, doppa we ton chapan türk dunyasining muhim simwol - belgiliridin biri ikenlikini bildürdi.

Polu élish üchün qatarda saqlawatqan aysel aras isimlik xanim türkistan polusini bek yaqturidighanliqini bildürüp: “Menmu öyde pishurup sinap baqtim, emma temi bu yerdikige oxshash temlik bolmidi. Polu élish üchün yérim sa'et qatarda nöwet kütüp saqlidim axiri mangimu tegdi” dédi.

Bashqa bir kishi tamaq élish üchün nöwet kütüshning bashqa bir qiziqarliq ish ikenlikini bildürüp mundaq dédi: “Poluning temini ötken yili bir qétim tétighan idim, bek temlik idi. Féstiwalgha yalghuz keldim, newrilirim birdemdin kéyin kélidu. Bu poluni bizmu öyde qilip baqtuq, emma temini bir türlük oxshitalmiduq.”

Bashqa bir kishi:“Men mushundaq yerlik medeniyet pa'aliyetlerni yaxshi körimen. Türkistan polusining temini tétip béqish üchün keldim, her qaysi milletlerning jem bolup birlikte ötüshini, pütün insanlarning birlikte qérindashlarche yashishini yaxshi körimen” dédi.

Ötken yili 4 - aydimu mushuninggha oxshash pa'aliyet ötküzülgen bolup 15 ming kishilik polu tarqitilghan idi.

Biz bu heqte pikir - qarashlirini élish üchün 10 ming kishilik poluni pishurup teyyarlighan ilhamjan ustam bilen söhbet élip barduq.

Ilham ustam esli qeshqerdin bolup 22 yil ilgiri qeshqerdin ottura asiya chiqqanliqini, 10 yil ilgiri türkiyege kélip olturaqlashqandin kéyin réstoran achqanliqini, hazir istanbulning lalili we zeytinburnu dégen rayonlirida ikki dane réstoran barliqi bu réstoranlar arqiliq türkistan tamaqlirini tonushturup kéliwatqanliqini bildürdi we türklerning pa'aliyetliride türkistan polusi teyyarlap bérish zakaslirining köpiyiwatqanliqini, buningdin türkistan tamaqlirigha türklerning qiziqiwatqanliqini we yaqturup yeydighanliqini körüwalghili bolidighanliqini bildürdi.