“Xelq'ara Uyghur tetqiqati zhurnili” ning yéngi sani oqurmenliri bilen yüz körüshti

Ixtiyariy muxbirimiz erkin tarim
2017.01.03
xelqara-uyghur-tetqiqati-zhurnili-8-san.jpg “Xelq'ara Uyghur tetqiqati zhurnili” ning torbéti, 8-san.
uygurarastirmalari.com

Türkiyede tunji mexsus Uyghur tetqiqati heqqidiki alte ayda bir neshr qilinidighan Ilmiy zhurnalNing 8-sani oqurmenliri bilen yüz körüshti.

Tor zhurnilining 8-sanida Uyghur tili, edebiyati, folklori, tarixi we medeniyiti toghrisida yézilghan 14 maqale we 3 kitab tonutush maqalisige orun bérilgen. Zhurnalning igisi we bash tehriri izmir ége uniwérsitéti türk dunyasi tetqiqat merkizining oqutquchisi proféssor doktor alimjan inayet ependi zhurnalning 8-sanini chiqirishqa emgek singdürgenlerge rehmet éytqandin kéyin, bu sanda orun bérilgen maqaliler toghrisida melumat berdi.

Bu sanda abdulwahit hesenjan ependining “Hazir zaman Uyghur yazghuchisi memti'imin hoshur we uning eserliri”, newshéhir haji bektash weli uniwérsitéti oqutquchisi doktor adem öger ependi bilen rejep tek ependi yazghan “Uyghurlarda hékmet éytish aditi we chaghatayche ikki qol yazmidiki hékmetler”, doktor exmet qaraman ependining “Uyghur sha'iri sabit abduraxman”, exmetjan mömin tarimining “20-Esirde xitayda Uyghur tarixi toghrisida élip bérilghan tetqiqatlar”, proféssor doktor alimjan inayetning “Uyghur xelq qoshaqlirigha xitaychining tesiri” qatarliq 14 parche maqalige orun bérilgen.

Zhurnalning igisi, proféssor doktor alimjan inayet ependi bu sanda élan qilin'ghan maqalilerning yuqiri ilmiy qimmetke ige ikenlikini bayan qildi.

Türkiyede yashawatqan Uyghur ziyaliysi abduweli ependi chet'elde türk tilida chiqiwatqan “Xelq'ara Uyghur tetqiqati ilmiy zhurnili” ning Uyghur tetqiqati üchün zor ehmiyetke ige ikenlikini bayan qildi.

Abduweli ependi “Xelq'ara Uyghur tetqiqati ilmiy zhurnili” ning 7-sani bilen bu sanida Uyghur edebiyati toghrisida ikki parche maqalisi élan qilin'ghanliqini, chet'elde Uyghur edebiyatini tonutushning zor ehmiyetke ige ikenlikini bayan qildi.

Proféssor doktor alimjan inayet ependi “Zhurnalning 4 yildin béri izchil halda torda chiqiwatqanliqi, weten ichi we sirtidin köp kishining torni ziyaret qiliwatqanliqi, yaxshi inkaslarning kéliwatqanliqi”ni bayan qildi.

4 Yildin béri élan qiliwatqan maqaliler dunyaning herqaysi jayliridiki Uyghur we bashqa millet ziyaliylirining ilmiy emgiki bolup, Uyghurlarning tarixi, tili, edebiyati, ijtima'iy ehwali we siyasiy weziyitini özige singdürgen halda “Xelq'ara Uyghur tetqiqati” zhurnilining bir pütün gewdisini teshkil qilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.