Yaponiyediki "Uyghurlar awazi" intérnét téléwiziyeside Uyghurlarning chéchek seylisi tonushturuldi

Ixtiyariy muxbirimiz haji qutluq qadiri
2017-04-27
Share
uyghurlar-awazi-yengi-chechek-1.jpg Yaponiyediki "Uyghurlar awazi" intérnét téléwiziyeside Uyghurlarning chéchek seylisi tonushturuldi.
uyghur-j.org

25-Aprél küni yaponiye Uyghur jem'iyiti teripidin tesis qilin'ghan "Uyghurlar awazi" intérnét téléwiziyesining 2017-yilliq 3-sani yotubé arqiliq resmiy tarqitildi.

Yaponiye Uyghur jem'iyitining tor bétide körsitilishiche, "Uyghurlar awazi" intérnét téléwiziyesining yéngidin tarqitilghan mezkur programmisining medeniyet sehipiside yaponlardiki gül seylisi bilen Uyghurlarning bagh-chéchek seylisi toghrisida sélishturma élip bérilghan.

Uyghur élide neshr qilin'ghan Uyghur medeniyitige da'ir kitablarda körsitilishiche, Uyghurlardiki bagh-chéchek seylisi bahar yeni köklem mezgilide, gül-giyahlar chécheklinip, yer-jahan rengdar bolghan künlerde bagh we dalalarda élip bérilidighan pa'aliyetliridin biri iken.

Yaponiye tarixiy menbeliride déyilishiche, yaponlardiki gül seylisi bolsa qedimiy nara dewridin bashlan'ghan yaponlarning en'eniwi sayahet pa'aliyetliridin biri bolup, adette 3-ayning axiridin 4-ayning béshighiche bolghan ariliqta derexler chécheklinip, chéchek échilghanda élip bérilidiken.

"Uyghurlar awazi" intérnét téléwiziyesining riyasetchiliridin biri bolghan yaponiye Uyghur jem'iyitining da'imiy hey'et ezasi mi'ura kotaro mezkur programmida Uyghurlar bilen yaponlarning medeniyet jehettiki bezi bir oxshashliqlar toghrisida toxtalghan.

Ziyaritimizni qobul qilghan yaponiye Uyghur jem'iyitining re'isi ilham mexmut yaponlardiki gül seylisi bilen Uyghurlardiki chéchek seylisi toghrisida toxtaldi.

Ziyaritimizni qobul qilghan "Uyghurlar awazi" intérnét téléwiziyesining körürmenliridin aroma xanim mezkur programmida déyilgen Uyghurlarning chéchek seylisi bilen yaponlardiki gül seylisi toghrisidiki qarashlar heqqide toxtilip: "Yaponlar bilen Uyghurlar arisidiki medeniyet jehettiki bezi bir oxshashliqlar heqiqeten kishini oylanduridu. Shunga ikki millet arisidiki bu oxshashliqlar toghrisida yenimu ilgiriligen halda tarixiy menbelerge asaslinip turup köpligen tetqiqatlarni élip bérishke toghra kélidu" dédi.

"Uyghurlar awazi" intérnét téléwiziyesining bu qétimqi programmisi ilgiri programmilirigha oxshashla keng körürmenlerge Uyghur tilidin sawaq bérish bilen axirlashqan. Bu qétim "Chéchek seylisi" dégen bir jümle söz körürmenlerge ögitilgen.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet