Ju'an amador: Uyghur leghmini asan tamaq emesken

Ixtiyariy muxbirimiz ekrem
2016.05.03
Juan-amador-uyghur-leghmen.jpg Gérmaniyediki meshhur ta'am ustiliridin biri bolghan ju'an amador Uyghur réstoranida lengmen étishni ögenmekte. 2016-Yili aprél, gérmaniye.
www.br.de

Yéqinda gérmaniyening fokus téléwiziye qanilida, gérmaniyediki meshhur ta'am ustiliridin biri bolghan ju'an amadorning 4 sa'et hepilishipmu, Uyghurche Lengmen ételmigenliki Körsitildi.

Her qandaq milletning özige xas ta'am medeniyiti bolghinidek, Uyghurlarningmu özgiche ta'am medeniyiti we dorapla öginiwalghili bolmaydighan ta'am rétsépliri bar. Yéqinqi yillardin buyan gherb elliride Uyghurlar achqan ashxana we réstoranlar sanining köpiyishige egiship, Uyghur ta'amlirigha qiziqidighanlarning sanimu éship barmaqta. Uyghur ta'amliri ichide bolupmu lengmen, gherb kishiliri yaqturup istémal qilidighan ta'amlarning birige aylanmaqta.

Gerche lengmen Uyghur a'ililiridiki omumlashqan we hemme Uyghur dégüdek yaxshi köridighan adettiki da'imliq tamaq bolsimu, lékin lengmen étish Uyghurdin bashqa milletler üchün hergizmu unche asan tamaq hésablanmaydiken. Gérmaniyediki ju'an amadorgha oxshash “Herqandaq tamaq qolidin kélidighan” dangliq ustimu lengmen étishte meghlup bolghanliqini ten alghan.

Fokus téléwiziye Qanilining “Mumkinsiz ashxana” namliq mexsus bir programmisi bolup, buningda dunyadiki oxshash bolmighan tamaq türlirini tonushturush we gérmaniyediki meshhur ustilarning dorap yaki qiyas qilip, özlirige natonush bolghan tamaqlarni körmey turup oxshitip étishtek maharetlirini körsitish mezmun qilinatti. Ötkende myunxén shehiridiki Uyghur ashxaniliridin biri bolghan “Teklimakan Uyghur réstorani” bu programmigha sehne bolghan. Gérmaniyediki 1-derijilik dangliq ta'am ustiliridin tém melsér bilen ju'an amador bu filimda rol alghan.

Xewerlerge asaslan'ghanda, ju'an amador gérman jama'itining neziride melum bir ta'amning qeyerde étilgenliki, qaysi milletning ta'ami ikenliki, qandaq tamaqliqi, némiler xuruch qilin'ghanliqi qatarliqlargha a'it héchnémini bilmey turup, körmey turup, anglimay turup, peqet aldigha tuyuqsiz keltürülgen ta'amni tétip körüpla höküm chiqirish qabiliyitige ige alahide iqtidarliq shexs hésablinidiken. Biraq u, bu qétim aldigha keltürülgen lengmen üstidin toghra höküm chiqiralmighan we lengmen étishke bel baghlap meghlup bolghan.

Heqiqetenmu, uning lengmen étish jeryani shunchilik müshkül we külkilik idi.

Filim körünüshide, dangliq usta ju'an amadorning aldigha qeyerdindur keltürülgen bir texse lengmen qoyulidu. Ju'an lengmenni tétip körüp, buning italyanche emes, belki asiyache tamaq ikenlikini jezmleshtüridu. Ishlitilgen köktat we dora-derman heqqide 70% toghra höküm chiqiridu. Xémirning yughurulushini qiyas qilidu. Könglide “ Qilalaymen” dégen ishenchke kélidu. Biraq, lengmen xémirini telepke layiq yughurushning qéyinliqini xiyaligha keltürüpmu baqmaydu.

Filimda bayan qilinishiche, ju'an amador bazardin lengmen üchün kéreklik xuruchlar dep qiyas qilghan nersilerning hemmisini sétiwélip, bérilgen uchurgha bina'en kocha arilap yürüp axiri teklimakan Uyghur réstoranini tapidu we özining bu yerde lengmen étishni sinaq qilish arzusi barliqini bildüridu. Réstoranning ayal xojayini reyhan xanim tamaq étidighan yerni uninggha bikarlap béridu. Ju'an amador ishni xémir yughurushtin bashlaydu. Kaméralar uning her bir herikitini, chékiside tepchirigen terlerge qeder körünüshke alidu. Biraq, u herqanche qilipmu lengmen xémirini telepke layiq yughuralmaydu. Yughurghan xémirige tuz salmaydu, xémir üzülüp kétip, lengmen chüshmeydu.

Teklimakan Uyghur réstoranining ayal xojayini reyhan xanim ékran aldida turup, fokus qaniligha, bu dangliq ustining xémirni ölchemlik yughuralmighanliqini bildüridu.

Reyhan xanim uninggha xémir yughurushni ögitidu. U ikkinchi qétim yughurulghan xémirda lengmen salidu. Emma qorumini qamlashturalmaydu. Bahalighuchilar bir ‏-birlep nomur qoyup, uninggha érishishke tégishlik 10 nomurdin aran 4 nomur béridu. Xulase qilghanda, bu dangliq ta'am ustisi 4 sa'et hepiliship, axiri özining lengmen étishte meghlup bolghanliqini étirap qilidu. U fokus qanilida qilghan sözide, lengmenning asan tamaq emeslikini tilgha alidu.

Uyghur ziyaliysi ümid agahi ependi bu toghrisida ziyaritimizni qobul qilip, chet'ellerde échilghan Uyghur ashxanilirida bolupmu Uyghur lengminining gherb kishilirining barghanséri qiziqishini qozghawatqanliqini tilgha aldi.

Ötken yili gérmaniye b r téléwiziye qanilimu qurban héyt mezgilide Uyghurlar toghriliq ishligen “Yipek yolidin myunxén'gha qeder” namliq filimida teklimakan Uyghur réstoraninimu ziyaret qilip, mexsus lengmen heqqidimu toxtalghan idi.

Uyghurlar lengmenni özlirining ijadiyiti dep qaraydu. Ilgiri gérmaniye metbu'atliridimu lengmenni italiyelik sayahetchi markopolo Uyghur ilidin öginip kélip, italiye kesme chöplirining dunyagha kélishige asas salghanliqini we teklimakan qumluqidin 2500 yilliq tarixqa ige lengmen chöpi tépilghanliqini bayan qilishqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.