Türkiyede ömrini Uyghur dewasigha atighan newzat türkten alemdin ötti

Ixtiyariy muxbirimiz erkin tarim
2016-12-15
Share
newzat-turkten.jpg Ömrini Uyghur dewasigha atighan adwokat, siyasiyon we aktip pa'aliyetchi newzat türkten ependi(Uyghur doppisi kiygen) sherqiy türkistan wexpide. 1965-Yili, türkiye.
RFA/Erkin Tarim

Ömrini Uyghur dewasigha atighan péshqedem siyasetchi, adwokat, Uyghur dewasining qollighuchisi newzat türkten ependi 12-ayning 9-küni késel sewebi bilen alemdin ötti. Uning namizi, 10-chésla chüshtin kéyin qeyseridiki chong meschitte chüshürülgendin kéyin qeyseri sheher qebristanliqigha depne qilindi. Depne murasimigha qeyseri shehirining bashliqi mustafa chélik, qeyseri waliysi, türkiye parlaméntning mu'awin re'isi sadiq yaqut ependi, ammiwi teshkilat mes'ulliridin bolup köp sanda kishi ishtirak qildi.

Uyghurlargha wakaliten sherqiy türkistan medeniyet we hemkarliq jem'iyiti re'isi séyit tümtürk ependi bashchiliqida 50 etrapida Uyghur qatnashti. Biz merhum toghrisida melumat igilesh üchün séyit tümtürk ependi we merhumni 51 yildin béri tonuydighan musteqil tetqiqatchi hamit göktürk ependi bilen söhbet élip barduq.

Séyit tümtürk ependi depne murasimigha sheher bashliqi, türkiye parlaméntining sabiq mu'awin re'isi bashchiliqida köp sanda kishining ishtirak qilghanliqini, merhumning méyitining üstige kök bayraq yépilghan halda namizining chüshürülgenlikini bayan qildi.

Türkiyede pa'aliyet élip bériwatqan sherqiy türkistan wexpining sabiq re'isi, musteqil tetqiqatchi hamit göktürk ependi adwokat we pa'aliyetchi merhum newzat türkten ependini 1965-yilidin tartip tonuydighanliqini, uning ömrining axirighiche qeyseridiki Uyghurlargha yardem qilghanliqini bayan qildi.

Hamit göktürk ependi merhum newzat türktenning adwokat, siyasiyon we aktip pa'aliyetchi ikenlikini bayan qildi.

Hamit göktürk ependi merhum newzat türkten ependining 46 yildin béri "Ejiyes" namliq bir zhurnal chiqiriwatqanliqini, merhumning ömrining axirighiche bu zhurnalning her sanida Uyghurlar toghrisida maqale élan qilghanliqini bayan qildi.

Sherqiy türkistan medeniyet we hemkarliq jem'iyiti re'isi séyit tümtürk ependi 2015-yili newzat türkten ependige ton kiydürüsh murasimi ötküzüp, newzat türktenning Uyghurlargha qilghan yardimi üchün uninggha ton we doppa kiydürgenlikini bayan qildi.

Newzat türkten ependi 1928-yili 6-ayning 9-küni qeyseride dunyagha kelgen. 1952-Yili istanbul uniwérsitéti qanun kespini püttürgendin kéyin qeyseride adwokatliq qilishqa bashlighan. Merhum newzat türkten ependi köp sanda ammiwi teshkilat qurup, bu teshkilatlar arqiliq qeyseridiki Uyghurlargha yardem qilipla qalmastin, erjiyes zhurnili arqiliq Uyghur mesilisining qeyseride we türkiyede tonulushi üchün zor töhpe qoshqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.