Türkiyede tebriklen'gen xelq'ara ayallar bayrimida Uyghur ayallirimu untulmidi

Sherqiy türkistan medeniyet we hemkarliq jem'iyiti ayallar bölümi bashliqi rabiye ilktürk xanim(soldin birinchi) sepdashliri bilen. 2016-Yili 8-mart, türkiye.

Türkiye memurlar uyushmisi ayallar komitéti 8-mart xelq'ara ayallar bayrimi munasiwiti bilen Uyghur ayallarni xatirilidi. 2016-Yili 8-mart, türkiye.

8-Mart xelq'ara ayallar bayrimi küni munasiwiti bilen merkizi qeyseri shehirige jaylashqan “Sherqiy türkistan medeniyet we hemkarliq jem'iyiti” ayallar bölümi Uyghur ayallargha alaqidar bayanat élan qildi. Uningdin bashqa yene sa'adet partiyisi ayallar bölümi, türkiye memurlar birleshmisi jem'iyiti ayallar bölümi shundaqla türkiyede yashawatqan bir qisim Uyghur ayallar élan qilghan bayanatlirida, Uyghur ayallar duch kéliwatqan mesililirini tilgha élip ötti.

“Sherqiy türkistan medeniyet we hemkarliq jem'iyiti” ayallar bölümi bashliqi rabiye ilktürk xanim teripidin élan qilin'ghan bayanatta, Uyghur ayallarning tughush hoquqining qolidin élin'ghanliqini bayan qilin'ghan.

Bayanatta mundaq déyilgen: “Sherqiy türkistanliq ayallar ana bolush hoquqidin we shepqet bilen chong qilidighan bir perzentke jan bérish hoquqidin mehrum qilindi, ularning ana bolush cheklendi. Xitayning esli meqsiti pilanliq tughut nopus siyasiti emes, belki sherqiy türkistan xelqini assimilyatsiye qilish we kelgüsini yoq qilishtur. Tughut cheklesh siyasiti astida bowaqlar élip tashlan'ghan'gha oxshash, nechche minglighan ana hayatidin ayrildi. Nechche minglighan ana toghmas halgha keltürüldi.”

Bayanatta yene, Uyghur anilarning eng chong tiragédiyeliridin birining bigunah tutulup türmilerge qamiliwatqan yashlarning arqisidin yürekliri pare-pare bolup azab ichide köz yéshi töküshi ikenlikini bildürülgen.

“Sherqiy türkistan ma'arip we hemkarliq jem'iyiti” ayallar bölümi bashliqi munewwer özUyghur xanim, 8-mart xelq'ara ayallar bayrimining Uyghur ayallar üchün héchqandaq mene ipade qilmaydighanliqini, chünki Uyghur ayallar pütün insaniy heq-hoquqidin mehrum qilin'ghanliqini, dunyadiki bashqa ayallardek heq-hoquqqa ige bolup yashash kéreklikini, buning üchün küresh qilish kéreklikini ipadilidi.

Türkiye memurlar uyushmisi ayallar komitéti 8-mart dunya ayallar bayrimi munasiwiti bilen muxbirlarni kütüwélip yighini uyushturdi we xelq'ara jama'etni, süriye, misir, pelestin, sherqiy türkistan, iraq, bosniye hersektiki ayallargha qarita yürgüzülüwatqan zulumlargha xatime bérish üchün birlikte heriket qilishqa chaqiriq qildi.

8-Mart xelq'ara ayallar bayrimi küni sa'adet partiyisi ayallar bölümi teripidin élan qilin'ghan bayanatta sherqiy türkistanliq Uyghur ayallarning qattiq qolluq we iskenje astida yashawatqanliqi tilgha élindi.

Sa'adet partiyisi ayallar bölümining re'isi sümeyye gündoghdu xanim bayanatida mundaq dédi: “Bügünki künde birmida, araqanda, sherqiy türkistanda, ottura sherqte urush ichide qalghan ayallar duch kéliwatqan shiddet we qattiq qolluq, iskenje we ayagh asti qilishlar körmeske séliniwatidu. 8-Mart xelq'ara ayallar bayrimi küni munasiwiti bilen biz sa'adet partiyisi ayallar komitéti bolush süpitimiz bilen, nechche milyon ayallar uchrawatqan zulum we jinayetlerge sükütte qéliwatqan, közlirini yumghan birleshken döletler teshkilatini eyibleymiz. Heq we adalet merkizi bolghan yéngi bir dunya sistémisida ayallarning we insaniyetning huzur, xushalliq we hörmetke érishidighanliqigha ishinimiz.”