Qirghizistan Uyghurliri yéngi yilni saxawetlik ishlar bilen qutlidi

Ixtiyariy muxbirimiz féruze
2018-12-31
Élxet
Pikir
Share
Print
Toqmaq shehiridiki anilar méyip balilargha yéngi yilliq pa'aliyet ötküzüp berdi.
Toqmaq shehiridiki anilar méyip balilargha yéngi yilliq pa'aliyet ötküzüp berdi.
RFA/Feruze

Qirghizistan Uyghurlirining ammiwi teshkilati bolghan "Ittipaq" jem'iyitige qarashliq ayallar komitéti bilen yashlar bölümi 2019-yili kirish harpisida bir qatar saxawetlik ishlarni élip bardi.

Her yilining 31-dékabir axshimi qirghizistanliqlar yéngi yil bayrimini qutlash murasimini ötküzidu. Yéngi yilni kütüwélish murasimini ötküzüsh en'enisi sabiq sowétlar ittipaqi dewridin tartip taki hazirghiche qirghizistan we bashqa ottura asiya jumhuriyetliride dawamliship kelmekte. Qirghizistan musteqil bolghandin kéyin bezi diniy guruppilar yéngi yil bayrimini ötküzüshni ret qilghan bolsimu, emma qirghizistandiki mutleq köp qisim ahaliler yenila yéngi yilni qutlash murasimigha alahide köngül bölüp kelmekte.

Adette yéngi yilni kütüwélish murasimi yesli we mekteplerde mexsus pa'aliyetler bilen ötküzülidu. Yeni gödekler üchün türlük oyun we nomurlar teyyarlinip, ulargha hékaye sözlesh, shé'ir oqush we bashqa oyun türidiki pa'aliyetler ötküzüp bérilidu. Halbuki, salametliki nachar yaki méyip balilar mekteplerdiki bu xil pa'aliyetlerge qatnishalmaydu. Bu ehwalni közde tutqan toqmaq shehiridiki "Ittipaq" jem'iyitining ayallar komitéti tursun'ay abitowaning bashliqida mexsus méyip balilar üchün oyun-programmilarni teyyarlap, ulargha türlük oyunchuqlar we shérin sowghatlarni tarqatti.

Radiyomiz ziyaritini qobul qilghan tursun'ay abitowa xanim toqmaq shehiridiki "Ittipaq" jem'iyitining ayallar komitéti méyip balilar üchün ötküzgen yéngi yilliq saxawetlik ishlar heqqide toxtaldi. U yene özlirining 5 yildin buyan méyip balilargha oqush jehette yardem körsitip kéliwatqanliqini bildürdi. 

Tursun'ay xénim yene özlirining méyip balilar üchün mexsus bir mektep échish arzusining barliqini tekitlep ötti. 

Yéngi yilni qutlash murasimi 28-dékabir küni toqmaq shehiridiki mektep-gimnaziyeside uyushturuldi. Mektep oqughuchiliri "Qar boway" we "Qar qiz" bolup yasinip, türlük oyun-tamashilarni élip bérishti. Ayallar kéngishining ezasi zeynure toxtiyéwa radiyomiz ziyaritini qobul qilip, méyip balilargha yardem körsitishni özlirining bir burchi dep bilidighanliqini, méyip yaki qaranchuqsiz balilar bir külüp xushal boluwalsa, özliriningmu xushal bolidighanliqini bildürdi.

Yéngi yil harpisidiki saxawetlik ishlarni "Ittipaq" jem'iyitining yashlar bölümimu élip bardi. Ular rishat ayupofning bashliqida mohtaj we köp perzentlik a'ililerge yéngi yilliq shérin sowghatlar teyyarlap, ulargha tarqitip bérishti. 

Igilinishiche, bishkek shehiri we uning etrapidiki yézilarda iqtisadiy ehwali qiyin we mohtaj a'ililer xéli köp iken. "Ittipaq" jem'iyitining yashlar komitéti "Alamédin" we "Qashqa su" yézilardiki mohtaj a'ililerge yardem bergenliki melum. Radiyomiz ziyaritini qobul qilghan yashlar bölümining ezasi küresh özliri yardem körsetken ikki a'ilining köp perzentlik a'ililer ikenlikini ilgiri sürdi. 

Qirghizistan ottura asiya döletliri ichide qazaqistandin qalsila Uyghur jama'iti eng köp yashaydighan dölet hésablinidu. Qirghizistan Uyghurliri qirghizistan musteqil bolghandin kéyin bashqa xelqlerge oxshashla jama'etlik ishlarda zich uyushup, her yilidiki bayram we héyt ayemlerde saxawetlik ishlarni élip barmaqta. Bolupmu her yili ramzan éyida, roza héyt we qurban héyt bayramlirida, balilar bayrimida, tebi'iy apet yüz bergende we yaki we qérindashliri éghir qiyinchiliqlargha uchrighanda her da'im yardem qolini sunup kelmekte.

Toluq bet