Yaponiye Uyghur birliki yaponiye parlamént ezalirigha rabiye qadir xanimning yéngi yilliq salimini yetküzdi

Ixtiyariy muxbirimiz haji qutluq qadiri
2017.01.10
Share on WhatsApp
Share on WhatsApp
rabiye-qadir-duq-yaponiye-bash-ministir-yardemchisi-seichi-eto.jpg D u q re'isi rabiye qadir xanim bashchiliqidiki Uyghur wekiller yaponiye bash wezir yardemchisi sé'iji éto ependimning ishxanisida sohbette. 2016-Yili 1-iyun, tokyo.
RFA/Qutluq

6-Yanwar yaponiye Uyghur birliki teshkilati yaponiye parlaméntidiki bir qisim ezalargha dunya Uyghur qurultiyining re'isi rabiye qadir xanimning yéngi yilliq salimini yetküzdi.

Yaponiyede pa'aliyet élip bériwatqan dunya Uyghur qurultiyi rehberlikidiki yaponiye Uyghur birliki teshkilati yaponiye parlaméntidiki bir qisim Uyghur mesilisini qollighuchi ezalar bilen uchrishish élip bérip, dunya Uyghur qurultiyining re'isi rabiye qadir xanimning yéngi yilliq salimini yetküzgen bolup, yaponiye parlaméntida élip bérilghan bu qétimqi uchrishishta mezkur teshkilat ezaliri aldi bilen yaponiye dölet bixeterlik komitétining sabiq re'isi, yaponiye parlamént ezasi, yaponiye parlaménti Uyghur dostluq guruppisining re'isi furiya kéyji we yaponiye bash weziri shinzo abéning yardemchisi éto sé'iji ependiler bilen ayrim-ayrim söhbette bolghan.

Ziyaritimizni qobul qilghan yaponiye Uyghur birliki teshkilatining re'isi turmuhemmet hashim bu heqte toxtaldi.

Yaponiye Uyghur birliki teshkilati kyushu shöbisining mes'uli imamura noh ibrahim bu heqte özining qarashlirini bayan qilip: “Teshkilatimizning da'im dégüdek yaponiye parlamént ezaliri bilen bu xildiki uchrishishlarni élip bérip Uyghur mesilisini biwasite halda yaponiye hökümet emeldarlirigha yetküzüshining ehmiyitini zor dep qaraymen. Chünki, yaponiye hökümet rehberliri xitay bilen bolghan her xil diplomatik uchrishishlarda elwette, Uyghur kishilik hoquq mesilisini tilgha élip xitaygha bu jehette bésim ishlitishte belgilik rol oynaydu dep oylaymen” dédi.

Turmuhemmet hashimning éytishiche, yaponiye Uyghur birliki teshkilatining ezaliri yaponiye parlamént ezaliri bilen yene pat yéqinda yaponiye parlaméntida élip bérilidighan dunya Uyghur qurultiyi rehberlirining bir qisim pa'aliyetliri üstidimu söhbette bolghan.

Ziyaritimizni qobul qilghan yaponiye Uyghur birliki teshkilatining himayichiliridin takashi sato özining yaponiye parlaménti Uyghur dostluq guruppisigha bolghan özgiche qarashlirini otturigha qoyup :“Yaponiye parlaménti Uyghur dostluq guruppisi 2012-yili tokyoda dunya Uyghur qurultiyining 4-nöwetlik qurultiyi chaqirilish aldida, xitay hökümitining yaponiye terepke qurultayning échilishini cheklesh toghrisida otturigha qoyghan türlük teleplirini diplomatik yollar arqiliq ret qilghan bolsimu, biraq shundin buyan yaponiye parlaménti Uyghur dostluq guruppisi dunya Uyghur qurultiyi rehberliri otturigha qoyghan bezi teleplerni téxiche orunliyalmidi. Men shexsen ularning bu yilqi xizmetliride Uyghurlargha emeliy bir ish qilip bérishini ümid qilimen” dédi.

Turmuhemmet hashimning bildürüshiche, bu qétimqi uchrishishta mezkur teshkilat ezaliri yene yaponiye parlaméntidiki öktichi siyasiy partiyelerdin biri hésablinidighan “Yaponiye qelbi” partiyesining mes'ulliri bilenmu Uyghur mesilisi toghrisida söhbet élip barghan.

Yaponiye Uyghur birliki teshkilatidin igilishimizche, mezkur teshkilat yéqin kelgüside rabiye qadir xanim bashchiliqidiki dunya Uyghur qurultiyi rehberlirining yaponiyede élip baridighan Uyghur kishilik hoquq pa'aliyetliri üchün hazirdin bashlap jiddiy teyyarliq qilish xizmitini bashlighan.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.