Istanbulda eysa yüsüp aliptékin wapatining 19 - yillliqi xatirilendi

Ixtiyariy muxbirimiz arslan
2014-12-15
Share
eysa-yusuf-efendi-xatirlesh-yighinida-soz-qiliwatqanlar.jpg Eysa yüsüp aliptékin wapatining 19 - yillliqini xatirlesh yighini
RFA/Arslan


2014 - Yili 12 - ayning 13 - küni sherqiy türkistan dawasining bayraqdari merhum eysa yüsüp aliptékinning wapatining 19 - yili munasiwiti bilen merhumni xatirilep ilmiy muhakime yighini ötküzüldi.

Yighin qur'an kerim tilawet qilish we shéhitlerning rohigha atap du'a qilish bilen bashlandi. Yighinda türk edebiyat wexpining re'isi serwet qapaqli söz qilip, merhum eysa yüsüp aliptékinning hayat waqtida birge ötken we birge pa'aliyet qilghan eslimlirini tilgha élip ötti.

Yighinning kéyinki bölümliri ilmiy muhakime bilen dawam qildi. Ilmiy muhakime yighinida istanbul uniwéristétining oqutquchsi proféssur abdulqadir donuk ependi, ége uniwéristétining oqutquchi proféssur alimjan inayet, marmara uniwéristétining oqutquchisi doktor abdulhemit awshar, yazghuchi we sabiq parlamént ezasi proféssur newzat yalchintashlar eysa yüsüp aliptékin we sherqiy türkistan mesilisi toghrisida söz qildi.

Istanbul türk dunyasi edebiyat fondining yighin zalida échilghan bu murasim sherqiy türkistan wexpi teripidin uyushturulghan bolup, murasimgha merhumning oghli erkin aliptékin, proféssur newzat yalchintash, proféssur mehmet saray, rasim jénis qatarliq muhim erbablar qatnashti we merhum eysa yüsüp aliptékinni xatirilep muhim söz qildi.

Doktor abdulhemit awshar eysa yüsüp aliptékinning hayati heqqide sözlep ötkendin kéyin, uning türkiyidiki siyasiy hayatini ikki türge ayrip mundaq dédi: "Eysa yüsüp aliptékin türkiyide ikki sahede pa'aliyet élip bardi, bularning birinchisi, türkiyining ichki siyasitige munasiwetlik kommunizmgha qarshi küresh qilish yolida tutqan siyasiy meydani. Ikkinchisi bolsa, sherqiy türkistanni asas qilghan halda tashqi türkler yeni türkiyige qarita sirtta we ichide bir xil qizghinliqni oyghitishqa oxshash pa'aliyetler yeni türkperwerlik meydani. Eysa yüsüp aliptékin türkiyide kommunizmgha qarshi küresh qildi. Kommunizmning epti - beshirini xelq ammisigha échip tashlidi we kommunizmgha qarshi éqimlar bilen birlikte heriket qildi. Shuning üchün eysa yüsüp aliptékin kommunizmgha qarshi we oxshash waqitta xelqini söyidighan milletperwer idi."

Biz merhum eysa yüsüp aliptékin toghrisida pikir qarashlirini élish üchün uni yéqindin tonuydighan we merhum hayat waqitda birge ötken yawropa sherqiy türksitan birlikining re'isi eniwerjan ependi bilen söhbet élip barduq.

Eniwerjan ependi eysa yüsüp aliptékinning özige qilghan wesiyetlirini tilgha élip mundaq dédi: "Men her qétim gérmaniyidin istanbulgha kélip merhumni ziyaret qilghan waqtimda, oghlum néme ish qiliwatisiler, deytti we xitayning zulumidin, sherqiy türkistan xelqining éziliwatqanliqidin dunyaning xewiri boliwatamdu? dep soraytti. Men yawropada élip bériwatqan pa'aliyetlirimizni anglitip turattim. Merhum eysa ependi qolumni ching tutup turup, her zaman qilidighan gipi: " siler yashlar bu dawaning igiliri, biz qérip kétiwatimiz, bayraqni silerge tapshurup bérip bu dunyadin ötüp kétimiz, siler wetenning musteqilliqi üchün xizmet qilinglar, deytti."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet