Кәнт секретари: «буйруққа асасән өйүмниң темидики меһраб шәкиллик оюқни төт часиға өзгәрттим»

Мухбиримиз шөһрәт һошур
2019-07-03
Елхәт
Пикир
Share
Принт
Уйғур аптоном районидики лагерларни көзитип келиватқан чәтәлдики хитай көзәткүчи шавен җаң өз мақалисидә қойған керийә һейтгаһ җамәсиниң сүрити. 2019-Йили 2‏-апрел.
Уйғур аптоном районидики лагерларни көзитип келиватқан чәтәлдики хитай көзәткүчи шавен җаң өз мақалисидә қойған керийә һейтгаһ җамәсиниң сүрити. 2019-Йили 2‏-апрел.
Social Media

Мәлум болушичә, хитайниң «диний әсәбийликкә қарши туруш» намидики сиясий боран-чапқуни мәсчитләрни өрүш, мәсчит мунарлирини йиқитиш басқучидин өтүп аһалиләрниң өй-имарәтлиридики меһраб вә һилал ай шәкиллириниму аман қоймиған.

Өткән һәптә иҗтимаий таратқулардики бир видийолуқ учурда уйғур райониниң мәлум бир җайида бир аялниң өз өйиниң торусидики лим яғачқа нәқишләнгән нәқишләрни гүрҗәк билән союп чиқириватқанлиқи көрситилгән. Униң алдида раийомизға кәлгән инкасларда ғулҗиниң һәрқайси йезилиридики өй-имарәтләрниң миллий пасондики нәқишлириниң төкүлүватқанлиқи мәлум қилинған иди.

Хотәндики бир кәнт секретариниң дәлиллишичә, бултурдин башлап меһраб шәкиллик көрүнүшләрму «диний әсәбийликниң аламити» дәп қарилип, аһалиләрниң өй-имарәтлиригә нәқишләнгән меһраблар түзливетилгән яки төт часа шәклигә кәлтүрүлгән.

Қәшқәрдики бир кәнт аяллар мудириму өзиниң мәһәллидә «диний әсәбийликни йоқитиш» һәққидә тәшвиқатқа йетәкчилик қиливатқанлиқини вә тәшвиқатида өй-имарәтләрдики меһраб шәклини йоқитишниң зөрүрлүкини чүшәндүрүватқанлиқини баян қилди. Униң дейишичә, нөвәттә у вәзипә өтәватқан тәвәликтә өй-имарәтләрдики меһраб қатарлиқ диний түс алған шәкил вә көрүнүшләр тәлтөкүс йоқитилған.

Хотәндики мәзкур кәнт секретари өз өйиниң темиға икки йил бурун бәлгилик миқдарда пул хәҗләп меһраб нәқишлигәнликини, бултурға кәлгәндә юқириниң уқтуруши билән бу шәкилни бузуп ташлиғанлиқини ашкарилиди. Униң дейишичә, илгири мәхсус һүнәрвән тәклип қилип нәқишлигән бу меһрабни бу йил өз қоли билән бузуп ташлиған. Андин сақчи вә кадирлардин тәшкилләнгән бир хизмәт гурупписи униң өй темидики бу өзгиришни тәкшүрүп өткүзүвалған. Бу секретар йәнә там вә түврүклиридики меһраб вә һилал ай шәкиллири йоқ қилинмиған бир қисим өй-имарәтләрниң пүтүнләй чеқиветилгәнликини тилға алди. У йәнә нөвәттә мәһәллә-кочиларни айланғанда һеч бир өй-имарәт вә қурулушларда меһраб, мунар вә һилал ай шәкиллирини учратқили болмайдиғанлиқини баян қилди.

Пикирләр (0)
Share
Толуқ бәт