Йеңисар наһийәсиниң һакими меһригүл өмәр "интизамға хилаплиқ қилиш" билән әйиблинип тәкшүрүлүшкә башлиған

Мухбиримиз әркин
2021-01-18
Share
Йеңисар наһийәсиниң һакими меһригүл өмәр "интизамға хилаплиқ қилиш" билән әйиблинип тәкшүрүлүшкә башлиған йеңисар наһийәсиниң һакими, наһийәлик парткомниң муавин секритари меһригүл өмәр. 2021-Йили январ.
Social Media

Йеңисар наһийәсиниң һакими, наһийәлик парткомниң муавин секритари меһригүл өмәр "интизам вә қанунға хилаплиқ қилиш" билән әйиблинип, хитай интизам тәкшүрүш вә ривизийә даирилири тәрипидин тәкшүрүш астиға елинған. У хитайниң 2017-йили башланған чоң тутқунидин буянқи 3-4 йил мабәйнидә тәкшүрүш астиға елинған нурғун уйғур һөкүмәт кадириниң биридур. Тәкшүрүшниң қандақ нәтиҗилинидиғанлиқи мәлум болсиму, лекин илгири тәкшүрүш астиға елинған уйғур кадирлириниң асасән һәммиси алди билән вәзиписидин елип ташлинип, андин җазаланған.

Көзәткүчиләр, хитай даирилириниң уйғур кадирлирини вәзиписидин елип ташлиши вә җазалиши, хәлқарада "ирқий қирғинчилиқ" дәп әйиблиниватқан хитай һөкүмитиниң уйғурларни бастуруш һәркитиниң бир парчиси икәнликини илгири сүрүп кәлди. Уйғур аптоном районлуқ интизам тәкшүрүш вә ривизийә комитетиниң уқтурушида, меһригүл өмәрниң "интизам вә қанунға еғир хилаплиқ қилишқа четилип, нөвәттә аптоном районлуқ интизам вә ривизийә комитети тәрипидин тәқип астиға елинғанлиқи вә тәкшүрүлүватқанлиқи" ни билдүргән, әмма униң интизам вә қанунға қандақ хилаплиқ қилғанлиқи һәққидә һечқандақ чүшәндүрүш бәрмигән.

Бу йил 54 яшлиқ меһригүл өмәрниң хизмәт һаяти 1985-йили қәшқәр дарилмуәллиминни пүттүрүп, 1987-йили қәшқәр конашәһәр наһийәсиниң зәмин йезисида башланғуч мәктәп оқутқучиси болуш билән башланған. У 33 йиллиқ хизмәт һаятида аяллар кадири, муавин базар башлиқи, наһийәлик аяллар бирләшмисиниң муавин башлиқи, пиланлиқ туғут идарисиниң башлиқи, тәшвиқат бөлүми башлиқи вә наһийәлик интизам тәкшүрүш секритари қатарлиқ вәзипиләрни өтигән. Меһригүл өмәр 2012-йилдин бери йеңисар наһийәсиниң һакими, наһийәлик парткомниң муавин секритари вәзиписини өтәп кәлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт