Uyghur mejburiy emgikige chétishliq moda markiliri üstidin qayta erz qilindi
2023.05.30
Aldinqi hepte merkizi parizhdiki yawropa Uyghur instituti, chiriklikke qarshi turush seperwerlik teshkilati shérpa (Sherpa), belge chaplash exlaqi kolléktipi we lagérda mejburiy emgekke shahit bolghan bir lagér shahiti teripidin skéchér, zara we bashqa bir qanche moda markiliri üstidin sotqa erz sun'ghan.
Erz qilin'ghan markilarning ichide yaponiye kiyim-kéchek markisi yuniklo(Uniqlo) ning firansiye tarmaq shirkiti, uning ana shirkiti téz parche sétish (Fast Retailing) shirkiti, shundaqla zara (Zara) markisining bash shirkiti inditéks(Inditex), firansiye moda öyi SMCP we amérikadiki ayagh ishlepchiqarghuchi skéchérs ( Skechers) qatarliqlar bar.
Pa'aliyetchiler xelq'araliq moda markilirini tekshürüshni telep qilghan bolup, ularni xitay hökümitining Uyghurlargha yürgüzüwatqan jinayetlirige shérik dep eyibligen. Ashu shirketlerning insaniyetke qarshi jinayet, irqiy qirghinchiliq, éghir qulluq emgiki we adem etkeschilikige chétishliq ikenlikini ilgiri sürgen.
Erznamide, dunyadiki paxta ishlepchiqirishning %20 tining Uyghur rayonidin kélidighanliqi, shunga her besh paxta kiyim-kéchekning biri Uyghur mejburiy emgek bilen bulghinishi mumkinliki körsitilgen.
Yuqirida tilgha élin'ghan guruppilar 2021-yili 4-ayda mushuninggha oxshash erzni birinchi qétim sun'ghan. Emma, parizhdiki teptish mehkimisi bu xildiki jinayetni sotlash hoquqi yoq dep bahane qilip erzni toxtitiwetken.
Biz bu heqte téximu tepsiliyrek melumatqa érishish üchün yawropa Uyghur institutining mes'uli, mezkur erzni sunushta halqiliq rol oynighan Uyghur siyasiy pa'aliyetchi doktor dilnur reyhanni bügünki söhbet programmimizgha teklip qilduq.
Söhbtimizning tepsilatini yuqiridiki ulinishtin anglighaysiler.