Бонда чақирилған “дуня иқлим өзгириши” йиғинда уйғур мәҗбурий әмгики мәсилиси оттуриға қоюлди

Берндин ихтиярий мухбиримиз һәбибулла изчи тәйярлиди
2024.06.07
dunya-iqlim-ozgirishi-yighin-1 Германийәниң бон шәһиридә чақирилған “дуня иқлим өзгириши” йиғини. 2024-Йили 3-июн.
RFA/Hebibulla Izchi

Германийәниң бон шәһиридә 3-июн күнидин 6-июнғичә чақирилған “дуня иқлим өзгириши” йиғиниға д у қ аяллар комитети рәиси, д у қ хәлқара мунасивәтләр директори зумрәтай әркин тәклип билән қатнашқан. У, бу йиғинда уйғур мәҗбурий әмгикини “дуня иқлим өзгириши” йиғининиң күнтәртипи әкиришкә чақириқ қилип, уйғур мәҗбурий әмгикини бу йиғинда күнтәртипкә елип кәлгән.

Зумрәтайниң билдүрүшичә, бу қетимқи йиғин, 11-айда әзәрбәйҗанниң бакуда өткүзүлмәкчи болған “дуня иқлим өзгириши” йиғининиң күнтәртипини бекитиш вә тәйярлиқ хизмәтлири йиғини икән. У, 5-июн күни, бу йиғинда уйғур мәҗбурий әмгикиниң “дуня иқлим өзгириши” йиғининиң күнтәртипидин бири болуши керәкликини тәкитләп; “дуняда ишлитиливатқан қуяш енергийәси хам мәнбәсиниң 35% тин көпрәкиниң шәрқий түркистандин келидиғанлиқини оттуриға қойған”

Зумрәтай әркин германийәниң бон шәһиридә чақирилған “дуня иқлим өзгириши” йиғинида. 2024-Йили 5-июн.
Зумрәтай әркин германийәниң бон шәһиридә чақирилған “дуня иқлим өзгириши” йиғинида. 2024-Йили 5-июн.
RFA/Hebibulla Izchi

Зумрәтай сөзидә йәнә, “шәрқий түркистандики қалаймиқан қезишлар, мәҗбурий әмгәк, хитай көчмәнлириниң қариғуларчә муһитқа бузғунчилиқ қилишиниң, шәрқий түркистанда екологийәлик муһитиға еғир зиян селиватқанлиқини, милйонлиған уйғурниң җаза лагерлирида килиматқа мунасивәтлик қуяш енергийәси саһәсидә мәҗбурий әмгәккә селиниватқанлиқини” тәкитлигән.

“дуня иқлим өзгириши йиғини” париж келишимини асас қилған, б д т ниң биваситә тәшкиллишидики хәлқаралиқ йиғин болуп, бу йиғинға әза дөләтләр “дуня иқлим өзгириши” йиғининиң париж келишимигә риайә қилиш мәҗбурийити бар. Д у қ ниң берлин ишханиси директори ғәюр қурбанниң қаришичә, бу йиғинға тунҗи қетим бир уйғур тәшкилатиниң вәкили тәклип қилиниши б д т вә һәр қайси органларниң хитайниң муһит бузғунчилиқи вә уйғур мәҗбурий әмгикигә диққәт қиливатқанлиқиниң ипадиси дәп қарашқа болидикән.

Зумрәтай әркин германийәниң бон шәһиридә чақирилған “дуня иқлим өзгириши” йиғиниға параллел чақирилған “адил тәрәққий қилишта карханиларниң роли” намлиқ музакирә йиғинида. 2024-Йили 5-июн.
Зумрәтай әркин германийәниң бон шәһиридә чақирилған “дуня иқлим өзгириши” йиғиниға параллел чақирилған “адил тәрәққий қилишта карханиларниң роли” намлиқ музакирә йиғинида. 2024-Йили 5-июн.
RFA/Hebibulla Izchi

Зумрәтай йәнә, бу йиғинға параллел һалда чақирилған “адил тәрәққий қилишта карханиларниң роли” дегән музакирә йиғинида “уйғур мәҗбурий әмгики” ниң тиҗарәт саһәсидә көз юмулидиған бир мәсилигә айлинип қеливатқанлиқини билдүрүп, қуяш енергийәси вә електиронлуқ аптомобилларниң уйғур мәҗбурий әмгики билән болған мунасивитини чүшәндүрүп өткән.

“дуня иқлим өзгириши” йиғини комитети һәр йили тәйярлиқ хизмәтлири йиғини чақирип, дуняниң һәр қайси җайлиридин кәлгән паалийәтчиләр вә кишилик һоқуқ қоғдиғучилиридин пикир алидиған болуп, бу һәқтә б д т килимат өзгиришини пәсәйтиш бөлүминиң директори җемис граберт “бу учурлар, тәдбир бәлгилигүчиләр вә алақидар тәрәпләрниң килимат өзгириши, тәрәққиятини баһалашта нишанға йетиш йолидики биринчи қол материял болалайду” дәп ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.