Тутқун мәмәттурсун даимниң куча наһийәлик 3-тәрбийәләш мәркизидә икәнлики дәлилләнди

Мухбиримиз шөһрәт һошур
2020-03-26
Елхәт
Пикир
Share
Принт
Куча наһийәлик 4-оттура мәктәпниң оқутқучиси мәмәттурсун даим мукапатланған вақти.
Куча наһийәлик 4-оттура мәктәпниң оқутқучиси мәмәттурсун даим мукапатланған вақти.
Oqurmen teminligen

Куча наһийәлик 4-оттура мәктәпниң нәмуничи оқутқучиси мәмәттурсун дайимниң 11 айдин буян тутқунда икәнлики радийомиз тәрипидин хәвәр қилинғандин кейин кучалиқ муһаҗирлардин бири радийомизға учур йоллап, мәмәттурсун даимниң аяли нурийәниң паралич кесәлликигә гириптар болғанлиқи вә нөвәттә беқишсиз қалғанлиқини мәлум қилди. Мухбиримизниң бу һәқтики ениқлиши давамида мәмәттурсун даимниң нөвәттә кучадики 4 лагердин бири болған аталмиш «3‏-тәрбийәләш мәркизи» дә икәнлики дәлилләнди.

Кучалиқ муһаҗирниң инкас қилишичә, тутқун мәмәттурсун даимниң аяли нурийә 2012‏-йили меңисигә қан чүшүш билән паралич болуп қалған. Мәмәттурсун даим тутқун қилинғандин кейин униң аяли нурийә беқишсиз қалған вә әһвали күндин-күнгә яманлашқан. Мәмәттурсун тутқунда болғанлиқи үчүн қолум-қошнилири нурийәдин һал сорашқа вә ярдәм қилишқа петиналмиған.

Мәмәттурсун һәққидә әң дәсләптә фейсбукта учур ашкарилиған уйғурийә алп намидики кишиму мәмәттурсуниң орун тутуп йетип қалған аялиниң тәқдиридин әндишә қиливатқанлиқини билдүргән иди.

Биз куча наһийәлик маарип идарисигә қайта телефон қилип, мәмәттурсун даимниң аялиниң әһвали һәққидә мәлумат соридуқ. Маарип идарисиниң бир хадими нурийәниң әһвалидин хәвәрсизликини, бу һәқтә 4‏-оттура мәктәп яки наһийәлик әдлийә идарисиниң мәлумати барлиқини тилға алди. Биз 4‏-оттура мәктәптин бу һәқтә мәлумат алалмиғандин кейин наһийәлик әдлийә идарисигә телефон қилдуқ. Телефонимизни қобул қилған бир әдлийә хадими очуқ һалда мәмәттурсун даим вә униң аяли һәққидики әһвалларни сорашқа болмайдиғанлиқини баян қилди.

Биз бу һәқтики ениқлашлиримиз давамида мәмәттурсун даим тутуп турулуватқан лагер һәққидиму мәлумат соридуқ. Алақидар бир сақчи хадими мәмәттурсунниң куча наһийәсидики 4 лагердин бири, йәни әң чоңи болған «3‏-тәрбийәләш мәркизи» дә икәнликини ашкарилиди. Бу лагерниң наһийә базиридин бираз чәттә икәнликини илгири сүргән бу хадим мәмәттурсун даимниң бу лагерда 10 миңларчә тутқун билән бирликтә хитай тили өгиниватқанлиқини илгири сүрди.

Вәзийәттин хәвәрдар кишиләрдин йәнә бири мәмәттурсун даимниң хитай тилиға пухта икәнликини әскәртиш билән бирликтә униң ришат вә шәрипә исимлик икки пәрзәнти барлиқи, шуңа нурийәниң өйдә ялғуз әмәслики, пәқәт мәмәттурсун даим тутқунда болғанлиқи үчүн дохтурханидики дохтур вә систераларниң униңға җиддий һалда көңүл бөләлмәйдиғанлиқидин әндишә қиливатқанлиқини илгири сүрди.

Пикирләр (0)
Share
Толуқ бәт