Мәхпий материялларда тилға елинған мәһкумниң исми нәби ғоҗаәхмәт икәнлики вә улуғкөл түрмисидә икәнлики ашкариланди

Мухбиримиз шөһрәт һошур
2019-12-13
Елхәт
Пикир
Share
Принт

Хитайниң мәхпий һөҗҗәтлири қатарида ашкариланған чақилиқ наһийәсигә аит сот һөкүмнамисидә мәһкумниң аталмиш «җинайити», йәни әтрапидики кишиләргә еғизини бузмаслиқ вә шәһваний филимларни көрмәсликини тәвсийә қилғанлиқи қәйт қилинған болсиму, әмма мәһкумниң исми мәхпий материялларни ашкарилиғучи тәрипидин өчүрүветилгән иди. Мухбиримизниң бу һөкүмнамә һәққидә елип барған телефон зиярәтлири давамида мәһкумниң исминиң нәбий ғоҗаәхмәт икәнлики вә нөвәттә чақилиқтин 500 километир узақлиқтики улуғкөл түрмисидә 10 йиллиқ җаза муддитини өтәватқанлиқи ашкариланди.

Мәхпий һөҗҗәтләр қатарида ашкариланған сот һөкүмнамисидә аталмиш «диний әсәбийлик» вә «миллий өчмәнлик» делосиниң 2016-йили 12-айда йүз бәргәнлики, мәһкумниң 2017-йили 8-авғуст күни тутулуп, 29-сентәбир күни қолға елинғанлиқи қәйт қилинған.

Биз делониң тәпсилатини сот хадимлириниң өз еғизидин аңлаш үчүн чақилиқ наһийәлик сот мәһкимисигә қайтидин телефон қилдуқ вә һөкүмни чиқарған сот хадимлири билән көрүшүшни тәләп қилдуқ. Телефонимизни қобул қилған бир хадим һөкүмнамидә тилға елинған бир қисим тәпсилатлар қатарида дело йүз бәргән орунниң тоғрилиқини дәлилләш билән бирликтә дело садир қилғучи, йәни мәһкумниң исминиң нәби ғоҗаәхмәт икәнликини ашкарилиди. Мәһкумниң исми ашкариланған сот һөкүмнамисидә учурни ашкарилиғучи тәрипидин өчүрүветилгән иди. Мәзкур хадим нәби ғоҗаәхмәтниң йеши вә аилә әһвали һәққидики соалимизға җаваб берәлмиди.

Илгирики ениқлашлиримиздин мәлумки, уйғур районида 2017-йилдин буян тутқун қилинған кишиләр саниниң көплүки сәвәбидин сот хадимлири интайин алдираш болуп кәткән. Шуңа көпинчә тутқунлар сот ечиш арқилиқ әмәс, бәлки алдин тәйярланған һөкүмнамиләргә исим толдуруш арқилиқ түрмиләргә йолланған. Биз бу хадимдин нәби ғоҗаәхмәт делосиниң немә үчүн есидә қалғанлиқини соридуқ. Әқәллий бир диний саватни еғиздин чиқарғанлиқи үчүн 10 йил кесилгән нәбий ғоҗаәхмәт делосиниң сот хадимлири арисида ғулғула пәйда қилған яки қилмиғанлиқини сориғинимизда у һәр бир хадимниң өзи қол тиққан делодин башқисиға арилишиш һоқуқи йоқлуқини баян қилди.

Мәзкур һөкүмдә мәһкумниң җаза муддитиниң 2027-йили8-айниң8-күни ахирлишидиғанлиқи йезилған, әмма җаза муддитини қәйәрдә өтәйдиғанлиқи йезилмиған. Мәзкур хадим нәби ғоҗаәхмәтниң нөвәттә чақилиқтин 500 километир, корладин бүгүргә қарап маңғанда 40 километирчә узақлиқтики улуғкөл түрмисидә икәнликини ашкарилиди.

Пикирләр (0)
Share
Толуқ бәт