Mexpiy matériyallarda tilgha élin'ghan mehkumning ismi nebi ghoja'exmet ikenliki we ulughköl türmiside ikenliki ashkarilandi

Muxbirimiz shöhret hoshur
2019-12-13
Share

Xitayning mexpiy höjjetliri qatarida ashkarilan'ghan chaqiliq nahiyesige a'it sot hökümnamiside mehkumning atalmish "Jinayiti", yeni etrapidiki kishilerge éghizini buzmasliq we shehwaniy filimlarni körmeslikini tewsiye qilghanliqi qeyt qilin'ghan bolsimu, emma mehkumning ismi mexpiy matériyallarni ashkarilighuchi teripidin öchürüwétilgen idi. Muxbirimizning bu hökümname heqqide élip barghan téléfon ziyaretliri dawamida mehkumning ismining nebiy ghoja'exmet ikenliki we nöwette chaqiliqtin 500 kilométir uzaqliqtiki ulughköl türmiside 10 yilliq jaza mudditini ötewatqanliqi ashkarilandi.

Mexpiy höjjetler qatarida ashkarilan'ghan sot hökümnamiside atalmish "Diniy esebiylik" we "Milliy öchmenlik" délosining 2016-yili 12-ayda yüz bergenliki, mehkumning 2017-yili 8-awghust küni tutulup, 29-séntebir küni qolgha élin'ghanliqi qeyt qilin'ghan.

Biz déloning tepsilatini sot xadimlirining öz éghizidin anglash üchün chaqiliq nahiyelik sot mehkimisige qaytidin téléfon qilduq we hökümni chiqarghan sot xadimliri bilen körüshüshni telep qilduq. Téléfonimizni qobul qilghan bir xadim hökümnamide tilgha élin'ghan bir qisim tepsilatlar qatarida délo yüz bergen orunning toghriliqini delillesh bilen birlikte délo sadir qilghuchi, yeni mehkumning ismining nebi ghoja'exmet ikenlikini ashkarilidi. Mehkumning ismi ashkarilan'ghan sot hökümnamiside uchurni ashkarilighuchi teripidin öchürüwétilgen idi. Mezkur xadim nebi ghoja'exmetning yéshi we a'ile ehwali heqqidiki so'alimizgha jawab bérelmidi.

Ilgiriki éniqlashlirimizdin melumki, Uyghur rayonida 2017-yildin buyan tutqun qilin'ghan kishiler sanining köplüki sewebidin sot xadimliri intayin aldirash bolup ketken. Shunga köpinche tutqunlar sot échish arqiliq emes, belki aldin teyyarlan'ghan hökümnamilerge isim toldurush arqiliq türmilerge yollan'ghan. Biz bu xadimdin nebi ghoja'exmet délosining néme üchün éside qalghanliqini soriduq. Eqelliy bir diniy sawatni éghizdin chiqarghanliqi üchün 10 yil késilgen nebiy ghoja'exmet délosining sot xadimliri arisida ghulghula peyda qilghan yaki qilmighanliqini sorighinimizda u her bir xadimning özi qol tiqqan délodin bashqisigha arilishish hoquqi yoqluqini bayan qildi.

Mezkur hökümde mehkumning jaza mudditining 2027-yili8-ayning8-küni axirlishidighanliqi yézilghan, emma jaza mudditini qeyerde öteydighanliqi yézilmighan. Mezkur xadim nebi ghoja'exmetning nöwette chaqiliqtin 500 kilométir, korladin bügürge qarap mangghanda 40 kilométirche uzaqliqtiki ulughköl türmiside ikenlikini ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.