YouTube
Америка ташқи ишлар министири майк помпейо хитай компартийәсиниң америка қурулмисиниң һәр қайси қатламлириғичә сиңип киргәнликини һәмдә америкиниң қиммәт қарашлирини бәрбат қилиш үчүн һәрикәт қиливатқанлиқи ейттип, һәр қайси штат башлиқлирини хитайниң сиңип кириш һәрикәтлиридин агаһ болушқа чақирди.
У, бу сөзләрни шәнбә күни чүштин кейин америка пайтәхти вашингтонда чақирилған штат башлиқлири бирләшмисиниң қишлиқ йиғилишида оттуриға қойди.
У хитай компартийәси бирликсәп бөлүмниң һәр хил йоллар билән штат башлиқлириға йеқинлишип уларни көзитидиғанлиқи, йеқинда хитайниң америкидики 50 нәччә штат башлиқи үстидин материял топлап уларниң характерини тәтқиқ қилип чиққанлиқини билдүрди.
У йәнә хитайниң америкида аталмиш «куңзи университетлири» ни қуруп, америкиниң пикир вә академийә әркинликигә тәсир көрситишкә урунғанлиқини ейтти.
У мундақ деди: «хитайниң тәшвиқати университетлардин бурун башлиниду. Хитай дуняниң һәр қайси җайлирида йәслидин, 12-синипқичә болған синипларни тәсис қилди. Әмма биз хитайда охшаш программиларни башлашқа имкансиз. Хитай биз тәрәптә немиләрни қилалмиса, бизму шуни хитайда қилалишимиз шәрт. Нөвәттә улар бизниң системимиз ичидә әркин еғинап йүрүшмәктә, әксичә биз уларниң системисидин пүтүнләй чәкләндуқ. Хитай бүгүнки балиларниң кәлгүсидики рәһбәрләр болидиғанлиқини обдан билиду.»
Помпейо йәнә штат башлиқлирини хитай билән сода қилишта һошяр болушқа, пенсийә маашлирини хитайға мәбләғ салғанда униң қәйәргә селинғанлиқиға етибар беришкә чақирди. У мушу йәргә кәлгәндә уйғурларни тилға алди.
У мундақ деди: «филорида пенсийә мааши системиси хитайдики бир ширкәткә мәбләғ салған. У ширкәт бу мәбләғни айландуруп хитай компартийәси бир милйон мусулманни тәқибләшкә ишлитидиған көзитиш системисиға салған.»
У йәнә калифорнийә пенсийә мааши мәблиғиниң хитай азадлиқ армийәсигә мал тәминләйдиған бир ширкәткә селинғанлиқини, буниң америкиниң дөләт хәвпсизликигә берип тақилидиған мәсилә икәнликини билдүрди.
Ташиқи ишлар министири помпейо йеқинқи бир нутқида хитай компартийәсиниң америка үчүн әң чоң тәһдит икәнликини билдүргән иди.
