Ғайиб мирадил һәсәнниң аниси турсунгүл тохтинияз һәққидә ашкарилиған учурлириниң тоғрилиқи дәлилләнди

Мухбиримиз шөһрәт һошур
2020-09-16
Елхәт
Пикир
Share
Принт
Иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән уйғур районида ирқий қирғинчилиқ давам қиливатқанлиқини оттуриға қоймақта. 2020-Йили сентәбир.
Иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән уйғур районида ирқий қирғинчилиқ давам қиливатқанлиқини оттуриға қоймақта. 2020-Йили сентәбир.
Social Media

Икки һәптиниң алдида иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән исимлик бир яш уйғурчә, хитайчә вә инглизчә үч хил тилда йотуб қанили арқилиқ баянат елан қилип, уйғур районида ирқий қирғинчилиқ давам қиливатқанлиқини оттуриға қойған иди. У баянатлириниң биридә аниси турсунгүл тохтиниязниң пиланлиқ туғут тәдбириниң зиянкәшликигә учриғанлиқи вә бу сәвәбтин 2017-йили үрүмчидики өсмә кесәлликләр дохтурханисида даваланғанлиқини тилға алған. Мухбиримизниң онсу наһийәси вә үрүмчи шәһиридики өсмә кесәлликләр дохтурханисиға қарита елип барған телефон зиярәтлири давамида баянатта дейилгән турсунгүл тохтиниязниң олтурақ адресиниң тоғрилиқи вә униң мәзкур дохтурханида бир мәзгил даваланғанлиқи дәлилләнди.

Бу йил 5-сентәбирдин кейин из-дерәксиз ғайиб болған мирадил һәсән 3-сентәбирдики хитайчә баянатида хитайниң уйғур районида ирқий қирғинчилиқ йүргүзүватқанлиқини оттуриға қойған вә бу қирғинчилиқниң пакитлиридин бири сүпитидә аниси турсунгүл тохтиниязниң хитайниң пиланлиқ туғут сияситиниң зиянкәшликигә учриғанлиқи вә 2017-йили үрүмчидики өсмә кесәлликләр дохтурханисида даваланғанлиқини паш қилған иди. Биз бу учурниң тоғра-хаталиқини дәлилләш үчүн алди билән онсу наһийәсидики алақидар органларға телефон қилдуқ.

Мирадил һәсәнниң мәзкур баянатида анисиниң онсу базири дапсән аһалиләр комитетида олтурушлуқ икәнлики тилға елинған. «Бәйду» учур амбирида көрситилишичә, онсу базири дапсән аһалиләр комитети, қумдәрваза аһалиләр комитети вә мәпихана аһалиләр комитети қатарлиқ9 аһалиләр комитетидин тәшкилләнгән икән.

Телефонимизни қобул қилған қумдәрваза аһалиләр комитетидики бир хадим турсунгүл тохтиниязниң дапсән аһалиләр комитетиға нопуслуқ икәнликини баян қилиш билән бирликтә, униң 2018‏-йили үрүмчидики өсмә кесәлликләр дохтурханисиниң башлиқи мәрдан дегән киши үстидин шикайәт қилип йүргәнликини тилға алди. Бу хадим мирадилниң иш чиқирип қойғанлиқини тилға алған болсиму, униң нөвәттики әһвали вә аниси турсунгүлниң һаят яки әмәслики һәққидә мәлумат берәлмиди.

Телефонимизни қобул қилған үрүмчидики өсмә кесәлликләр дохтурханисиниң бир хадими дәсләптә балнетса номури болмай туруп, сабиқ бимарларниң кимликини тапқини болмайдиғанлиқини ейтти. Бу хадимниң дейишичә, үрүмчидә бирла өсмә кесәлликләр дохтурханиси бар болуп, бу уйғур аптоном районлуқ өсмә кесәлликләр дохтурханисидур. Мәзкур хадим турсунгүл тохтиниязниң шикайәт қилип йүргәнлики илгири сүрүлгән мәрдан исимлик кишиниң бу дохтурханида илгири мәсул рәһбәр болуп ишлигәнликини дәлиллиди. Биз бу хадимдин турсунгүл тохтиниязни исим-фамилиси бойичә, дохтурханиниң компютер системисидин издәп беқишини тәләп қилдуқ. Хадим системини көздин кәчүргәндин кейин, сабиқ бимарлар тизимликидә турсунгүл тохтинияз исимлик бир аял бимарниң бар икәнликини баян қилди. У йәнә системида турсунгүл тохтиниязниң адресиниң мирадилниң баянатида дейилгән билән әйнән икәнликини ашкарилиди. Мирадил һәсән баянатида анисиниң нөвәттә һаят яки әмәсликидин хәвәрсизликини баян қилған иди. Мәзкур дохтурхана хадимидин турсунгүл тохтиниязға қандақ диагноз қоюлғанлиқи вә қандақ давалаш елип берилғанлиқини сориғинимизда, у бимарларниң бу түр учурлирини ашкарилашқа болмайдиғанлиқини ейтти. Биз униңдин турсунгүл тохтиниязниң нөвәттә һаят яки әмәсликини сориғинимизда, у бу соалға җаваб беришниму қәтий йосунда рәт қилди.

Биз ахирида униңдин турсунгүл тохтиниязниң бу дохтурхана мәсули мәрданниң үстидин әрз сунған вақтиниң қачан икәнликини сориғинимизда у «2018‏-йили» дәп җаваб бәрди.

Юқирида ғайиб мирадил һәсәнниң баянатлирида тилға елинған аниси турсунгүл тохтиниязниң адреси вә бир мәзгил үрүмчидики өсмә кесәлликләр дохтурханисида даваланғанлиқиниң дәлилләнгәнлики һәққидә аңлитиш бәрдуқ.

Пикирләр (0)
Share
Толуқ бәт