Onsuning jam bazirida 31 yashliq ana amine qadir yighiwélish lagérida jan üzgen

Muxbirimiz shöhret hoshur
2018.08.23
lager-yepiq-terbiyelesh-saqchi.jpg Melum “Yighiwélish lagéri” aldida pos turuwatqan xitay saqchi.
BBC

Muxbirimizning aqsudiki lagérlar heqqide ehwal igilishi dawamida onsu nahiyesining jam bazirida yéqinqi 3 ay ichide 7-8 kishining yighiwélish lagéridin jesiti chiqqanliqi, ölgüchilerdin birining jam bazirining tümen kentide olturushluq bir perzentning anisi, 31 yashliq ana amine qadir ikenliki ashkarilandi.

Aqsudiki lagérlar heqqide ehwal éniqlishimiz dawamida lagérda hayatidin ayrilghanlarning sani we kimliki heqqidimu melumat soriduq. Saqchi xadimliridin biri onsu nahiyesining jam yézisidiki 31 yashliq bir ayalning buningdin birqanche ay ilgiri lagérda jan üzgenlikini ashkarilidi. U ölgüchining tümen kentidin ikenlikini tilgha alghan bolsimu, emma u isim-familisi qatarliq tepsiliy kimliki heqqide melumat bérelmidi.

Biz bu yip uchigha asasen onsu nahiyesining jam bazarliq saqchixanisigha téléfon qilduq. Saqchi xadimliri deslepte buning “Dölet mexpiyetliki” ikenlikini tilgha élip, ehwal heqqide melumat bérelmidi. Saqchixanidiki yene bir xadim jam yézisida yéqinqi 4 aydin béri 7 -8 kishining lagéridin jesiti chiqqanliqini, bulardin birining amine qadir isimlik 31 yashliq bir ayal ikenlikini ashkarilidi.

Melum bolushiche, amine qadir bir perzentning anisi bolup, yoldishi namelum seweb bilen birqanche yil burun tügep ketken. Ilgirilep ehwal éniqlishimiz dawamida bir dölet amanliq saqchi xadimi amine qadirning yürek késili qozghilip jan üzgenliki heqqide gep tarqalghanliqi, emma heqiqiy ölüm sewebining özigimu namelum ikenlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.