Türkiyediki yash Uyghur chish doxturining yéngi muweppeqiyiti

Ixtiyariy muxbirimiz erkin tarim
2015-06-01
Share
abdukerim-bughra-chish-doxtur-turkiye-7.jpg Türkiyediki yash Uyghur chish doxturi doktor abdukérim bughra achqan “Inji chish we éghiz salametliki merkizi” doxturxanisinig échilish murasimida qirshehir sheher bashliqi yashar baghchechi ependimu lénta kesti. 2015-Yili may, türkiye.
RFA/Erkin Tarim

Türkiyede chish doxturluq saheside oqup yétishken doktor abdukérim bughra türkiyening qirshehir shehiride “Inji chish we éghiz salametliki merkizi” namida doxturxana échip özining kespi sahesidiki yéngi muweppeqiyetlirini namayan qilishqa bashlidi.

Doxturxanining échilish murasimigha qirshehir sheher bashliqi yashar baghchechi ependi, parlamént ezasi namzatliri, abdukérim bughraning oqutquchiliri, kesipdash dostliri we enqerediki Uyghurlardin bolup köp sanda kishi qatnashti. Doxturxana qirshehir shehiridiki chong jame imamining du'asi bilen bashlandi. Ikki qewetlik kichik binada échilghan chish doxturxanisini abdukérim bughra bilen abdullah sulubulut ependi ortaq achqan bolup, doxturxanida 9 chish doxturi xizmet qilidiken.

Abdukérim bughra yéqinqi yillarda Uyghur élidin türkiyege oqushqa kélip, tiriship oqup, netije qazan'ghan Uyghur yashlirining biridur.

Abdukérim bughra 1977-yili 9-ayning 1-küni qarimay shehiride tughulghan. 1978-Yili dadisining xizmiti munasiwiti bilen poskam nepitke köchüp barghan. Bashlan'ghuch we toluqsiz ottura mektepni poskamda oqughandin kéyin xitayning nenjing shehirige toluq ottura mektepni oqush üchün ewetilgen. Tunji qarar ichkiride toluq ottura mektep oqush üchün ewetilgen 32 oqughuchi arisida orun alghan abdukérim bughra 1996-yili béyjing merkizi milletler uniwérsitétining teyyarliq sinipida bir yil oqughan. 1997-Yilidin 2002-yilighiche shin jyang tébbiy uniwérsitétining chish doxturluq fakultétida oqughan. 2005-Yili magistir we doktorluq unwani üchün oqush meqsitide türkiyege kelgen abdukérim bughra ependi, 2013-yilida enqere ghazi uniwérsitéti chish doxturluq fakultétining éghiz boshluqini dawalash we tüzesh kespide doktorluq unwani aldi.

Doxtur abdukérim bughra ependi 10 yil waqit ichide türkiyediki bu kesiptiki 1500 doxtur arisida orun aldi. U köp sanda xelq'araliq ilmiy muhakime yighinlirigha qatnashqandin sirt yene özi yawropa ölchemlirige toshidighan doxturxana échish sewiyesige yetken.

30- May küni türkiyening ichki anatoliye rayonidiki qirshehir shehiride échilghan shehiride “Inji chish we éghiz salametliki merkizi” ning échilish murasimida dr. Doxtur abdukérim bughra ependige mikrofonimizni uzattuq.

U: “Siz chet'eldiki 10 yilliq hayatingizda zor muweppeqiyetlerni qolgha keltürdingiz, nurghun meblegh sélip doxturxana achidighan sewiyige keldingiz buning siri néme?” dégen so'alimizgha jawab bérip, buning sirining tirishish we köp tirishish ikenlikini tekitlidi.

U, türkiyege yéngi kelgende nurghun qiyinchiliqlargha duchar bolghanliqini, hetta mektepke bérish üchün aptobusqa chiqidighan puli yoq künlerni béshidin ötküzgenlikini, soghuqta gaz puli alidighan puli yoq soghuq öylerde yotqan'gha yöginip olturup ders tekrarlighanliqi, kéche-kündüz japaliq tirishish netijiside bügünki künde doxturxana achalaydighan küchke yetkenliki éytti. U, chet ‘elde oquwatqan Uyghurlarni kichik qiyinchiliqlardin qorqup, oqushtin waz kechmeslikke tiriship öginishke chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet