Dangliq Uyghur gimnastikichi nariman qurbanof olimpik musabiqiside kümüsh médalgha érishti

Qazaqistanliq gimnastikichi nariman qurbanof yéqinda firansiye paytexti parizhda ötken olimpik musabiqiside kümüsh médalgha érishti

Qazaqistanliq gimnastikichi nariman qurbanof yéqinda firansiye paytexti parizhda ötken olimpik musabiqiside tenheriketning az uchraydighan yaghach atta oyun körsitish türi boyiche 15.433 Nomur bilen ikkinchi orunni igilep, kümüsh médalgha érishti. Birinchi orunni 15.533 Nomur bilen irélandiyelik ris mak lénagan, üchinchi orunni 15.300 Nomur bilen amérikaliq stiwén nédoroshik igilidi.

Qaz tag, qazaq axbarat biyurosi, zakon qazaqistan qatarliq inawetlik ammiwi axbarat wasitiliri nariman qurbanofning olimpik musabiqiside gimnastika boyiche kümüsh médalgha érishkenlikining qazaqistan tarixida tenheriketning bu türi boyiche qolgha kelgen tunji mukapat ikenlikini alahide tekitligen. Mezkur metbu'atlarning xewiride éytilishiche, qazaqistan gimnastikisining tarixida 2024-yil 3-awghustqiche olimpik musabiqisining mukapatigha érishken tenheriketchi bolmighanidi. Mana emdi mundaq adem bar boldi. U bolsimu, nariman qurbanoftur. Nariman alte yéshidin tenheriketning mushu türi bilen shughullan'ghan.

RFA/Oyghan

Biz olimpik musabiqisining kümüsh médal sahibi, gimnastika boyiche xelq'ara tenheriket mahiri nariman qurbanof bilen alaqileshtuq. U ziyaritimizni qobul qilip, mundaq dédi: “Olimpik musabiqisining axirqi basquchi tügep, bir nechche kün ötken bolsimu, men téxila özümge kélelmeywatimen we alghan médalimning qanchilik muhimliqini chüshinip ülgürelmeywatimen. Méning pütkül élimizning we uning sirtidiki muxlislirim we tenheriketke qiziqquchilar méni peqet tebriklepla qalmay, belki ulargha xushalliq béghishlighanliqim üchün özlirining minnetdarliqini bildürüwatidu. Men, elwette, hazir intayin bextlikmen. Shuningdek bu ghelibining qanchilik ulughluqini chüshinishke tirishiwatimen. Méning utuqumni ata-anam we yéqinlirim körüp, nahayiti xushal boldi. Bolupmu da'im yénimda bolghan dadam bu bextke xushal bolup, özini yettinchi asmanda yürgendek sézip yüridu. Tughqanlirimning barliqi méni tebriklep, shadlanmaqta”.

RFA/Oyghan

Narimanning dadisi hüsenjan qurbanof öz oghlini 6 yéshidin 15 yashqa kirgiche ögetken bolup, musabiqilerning hemmiside dégüdek birge bolghan.

Narimanning bu qétimqi utuqi bolupmu Uyghur yashlirini qattiq xushal qildi we hayajanlandurdi.

Radiyomiz ziyaritini qobul qilghan qazaqistanliq Uyghur yash aktiplirining biri bahar rejepowa xanim mundaq dédi: “Buningdin ikki ay ilgiri biz dangliq gimnastikichi nariman qurbanofning parizhda ötidighan olimpik musabiqisige qatnishidighanliqi toghriliq xewerni anglap, qattiq xushal bolghan iduq. Pütkül qazaqistan xelqi, shu jümlidin Uyghurlarmu narimanning bu olimpik musabiqiside mukapatliq orun igileydighanliqini kütti we shuninggha ishendi. Mana, nariman kümüsh médal aldi we barliqimizning ishenchisini aqlidi. Hazir köpligen ijtima'iy torlarda mushu toghriliq gep boluwatidu. Qazaqistanning ammiwi axbarat wasitilirimu buni xewerlep, hetta qazaqistan gimnastika tarixida mundaq utuqning ilgiri bolmighanliqini, nariman qurbanofning buninggha deslep yol achqanliqini éytiwatidu. Rast, narimanning ismi 2018-yildin buyan élimizning metbu'at sehipiliride pat-patla tilgha élinip keldi, pütkül élimiz boyiche tonuldi. Uning tirishchanliqi, uning iradisi biz, yashlar üchün chong ülge bolup qalidu désem, ashurup éytqan bolmaymen. Men nariman qurbanofqa, uning ustazliri, yeni dadisi hüsenjan qurbanofqa, shundaqla mahmut iskenderofqa we bashqimu uning qollap-quwwetligüchilerge özümning shexsiy rehmitini éytqum kélidu. Nariman'gha yenimu chong utuqlar tileymen”.

RFA/Oyghan

Biz tenheriket muxlisliridin biri, péshqedem ustaz tursun sadirof bilen alaqileshtuq. U mundaq dédi: “Öz waqtida qazaqistandin dangliq Uyghur tenheriketchilirining yétilip chiqip, sabiq sowét ittipaqini we qazaqistanni dunyagha tonutqanliqi bizge yaxshi melum. Mesilen, tosalghuluqlar bilen 110 métir musapige yügürüsh boyiche chémpiyon atalghan armiye hoshurofning bu rékortini qazaqistanda birmu tenheriketchi yéngilalmighan. Shundaqla boks boyiche sowét ittipaqining ikki mertem chémpiyoni abduréshit abdraxmanof xelq'ara tenheriket mahiri dégen ataqni alghan tunji qazaqistanliq bokschidur. Mana bügün biz yene bir xushalliqning guwahchisi boluwatimiz. Yash gimnastikichi nariman qurbanof yéqinda parizhda ötken olimpik musabiqiside dunya boyiche eng küchlük sekkiz tenheriketchining ichidin ikkinchi orun'gha ige bolup, kümüsh médal bilen mukapatlandi. Bumu qazaqistan üchün chong yéngiliq boldi. Chünki nariman qazaqistanliq tenheriketchilerning ichidin gimnastika boyiche olimpik musabiqisining kümüsh médalini yéngiwalghan tunzha tenheriketchi. Bu, elwette, élimiz üchün, xelqimiz üchün chong abruy. Hazir qazaqistanda tenheriketning her xil türliri boyiche dunya musabiqiliride chong utuqlar qaziniwatqan yashlirimiz köplep sanilidu. Men narimanning qazaqistanning kök bayriqini kötürüp chiqqinini körüp, anglap, qattiq xursen boldum we uninggha, uning ata-anisi, tirénérlirigha apirin dédim. Qazaqistan tenherikitini dunyagha tonutuwatqan nariman oxshash yashlirimizgha men minnetdarliqimni bildürüp, chong utuqlar tileymen”.

Igilishimizche, nariman qurbanof 2018-yili kanadaning monré'al shehiride ötken gimnastika boyiche musabiqide dunya musabiqisi boyiche yéngiliq yaratqan iken. Shu waqitta xelq'ara gimnastika fédératsiyesi uning téxnikisigha ‛qurbanof‚ yaki in'glizche ‛the kurbanov‚ dep nam bérilgen idi.