Tutqundiki pénsiyonér niyaz nasirning lagérdin jesiti chiqqan

Muxbirimiz shöhret hoshur
2021-12-17
Share
Tutqundiki pénsiyonér niyaz nasirning lagérdin jesiti chiqqan Watikan shehirining ikki hessisi bilen teng, 10,000 jinayetchi sighidighan ürümchi 3-türmisining aldi körünüshi. 2021-Yili 23-aprél.
AP

A'iliside 3 perzenti dölet xizmetchisi bolghan, özimu ashliq idarisidin pénsiyege chiqqan 78 yashliq niyaz nasir, lagérda éghir késel halitidimu qoyup bérilmigen. Xitay da'iriliri uning perzentlirining dadisini kapaletke qoyup bérish telipi keskin ret qilghan. Netijide 2018‏-yili tutup kétilgen niyaz nasirning ötken yilning axiri lagérdin jesiti chiqqan.

Toqquzaqliq bir muhajirning radiyomizgha inkas qilishiche, toqquzaq ashliq idarisining pénsiyonéri niyaz nasir dégen kishi 2018-yili 76 yéshida lagérgha élip kitilgen. Xéli bir mezgilgiche a'ilisi bilen körüshtürlmigen niyaz nasir 2018-yilning axirliri a'ilisi bilen ékranda körüshtürülgen. Diyilishiche, niyaz nasirning üch perzenti dölet xizmetchisi bolup, ular dadisining ékrandiki halitining bekmu ajiz we nachar ikenlikini körüp, uning salametlikdin endishi'e qilghan. Ular dadisining a'ilide terbiyelinishini telep qilip kapaletke qoyup bérish heqqide alaqidar organlargha iltimas sun'ghan. Da'iriler niyaz nasirning salametlikide mesile yoqluqi we bashqilardin alahide yaxshi ikenlikini bildürüp, uning lagérdin qoyup bérilishini ret qilghan. Toqquzaqtiki bu neper üch dölet xizmetchisining ikkisi kompartiye ezasi turuqluq, közliri barghanséri chongqurlap, ingekliri choqchiyip we chirayi tatirip kétiwatqan dadisini lagérdin élip chiqishqa qurbi yetmigen. Ötken yilning axirigha kelgende, niyaz nasirning jesiti a'ilisige tapshurulghan.

Biz bu uchurlarning toghriliqini delillesh üchün, toqquzaqtiki alaqidar organlargha téléfon qilduq.

Toqquzaq nahiyelik edliye idarisining bir xadimi, niyaz nasirning üch perzentining uni kapaletke élip chiqiriwélish heqqide telep sun'ghanliqidin xewiri yoqluqini éytti. U bu türdiki ishlarning, jümlidin lagérdiki ölüm xewerlirining edliye xadimi turuqluq üzlirige uqturulmaydighanliqini eskertti. U yene bulaqsu saqchixanisining bashliqi bilen yéqin munasiwiti bolsimu, niyaz nasir dégen kishining ölümi heqqide héchqandaq gep anglimighan'ghliqi tilgha aldi.

Radiyomizgha kelgen inkasta, pénsiyonér niyaz nasirning lagér doxturxanisida jan üzgenliki we jesiti a'ilisige tapshurulghanda, uning ölüm sewebi heqqide héchqandaq izahat bérilmigenliki, shundaqla tézlikte yerlikige qoyuwétishke buyrulghanliqi qeyt qilin'ghan. Toqquzaq bulaqsudin téléfonimizni qobul qilghan bir amanliq mudiri, pénsiyonér niyaz nasirning2018-yili tutqun qilinip, lagérda jan üzgenlikini delillidi.

Radiyomizgha kelgen inkasta déyilishiche, niyaz nasir dégen kishining bulaqsu yéza 6-kentte olturushluq ikenliki, üch perzentining ismlirining abdulnasir, abdul'ehet we aman'gül ikenliki qeyt qilin'ghan. Bulaqsudiki mezkur amanliqi mudiri niyaz nasirning mezkur üch perzentining nahiyilik ashliq idarisi, yéza-igilik bankisi we soda-sana'etni memuriy bashqurush idarisida xizmet qilidighanliqini ashkarilidi, emma ularning dadisini lagérdin élip chiqish üchün néme ishlarni qilghanliqidin xewersizlikini éytti.

Toqquzaqliq muhajirning inkasida déyilishiche, niyaz nasir jan üzüshtin bir ayche awwal perzentliri bilen ékranda körüshken bolsimu, u salametlikide körüliwatqan mesile heqqide héchqandaq éghiz achmighan, perzentlirining bu heqtiki so'allirini jawabsiz qaldurghan. Ilgiri radiyomiz ziyartini qobul qilghan bir lagér saqchisi lagér tutqunliri a'ilisi bilen téléfonda körüshkende, öz ehwalidin shikayet qilishqa bolmaydighaliqi, choqum ehwalini yaxshi dep melumat bérishke mejbur ikenlikini ashkarilighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet