Язғучи нурмуһәммәт тохтиниң лагердин чиқип бир айдин кейин һаятидин айрилғанлиқи дәлилләнди

Мухбиримиз шөһрәт һошур
2019-06-12
Елхәт
Пикир
Share
Принт
Атақлиқ язғучи нурмуһәммәт тохти әпәнди. (Вақти вә орни ениқ әмәс)
Атақлиқ язғучи нурмуһәммәт тохти әпәнди. (Вақти вә орни ениқ әмәс)
Perzentliri teminligen

Атақлиқ язғучи нурмуһәммәт тохтиниң өлүм учури иҗтимаий таратқуларда кәң тарқилип, күчлүк ғулғула қозғимақта. Әмма хитай даирилири мәрһумниң өлүми һәққидики учурларни җәмийәттин йошурмақта.

Иҗтимаий таратқулардики бәзи учурларда дейилишичә, атақлиқ язғучи нурмуһәммәт тохти хотәндики бир йиғивелиш лагерида җан үзгән. Йәнә бәзи учурларда дейилишичә, у еғир кесәл һаләттә лагердин аилисигә қайтурулған вә дохтурханида һаятидин айрилған. Йәнә бәзи учурларда униң өйидин дохтурханиға елип кетиливатқанда җан үзгәнлики қәйт қилинған. Һәтта бәзи учурларда язғучиниң җәсити лагердин өйигә қайтурулғанда путидики кишәнниң техи еливетилмигәнлики илгири сүрүлгән.

Һөкүмәт органлирида узун мәзгил хизмәт қилған, уйғур әдәбиятида өчмәс из қалдурған язғучи нурмуһәммәт тохтиниң өлүми һәққидә та бүгүнгә қәдәр уйғур районидики һеч бир ахбарат оргинида учур берилмиди. Муһаҗирәттики уйғур көзәткүчиләр мана мушу әһвалға қарапла мәрһумниң лагерда өлгәнлики яки лагердин чиқип өлгәнлик учуриниң тоғрилиқини пәрәз қилишмақта.

1949‏-Йили хотән наһийәсиниң тәвәккүл йезисида туғулған язғучи нурмуһәммәт тохти 1977‏-йили шинҗаң университетини пүттүргәндин кейин, илгири-кейин болуп хотән педагогика алий техникомида оқутқучи вә хотән вилайәтлик парткомда катип болуп хизмәт қилған. Әмма бу органларға телефон қилғинимизда улардин бәзилири язғучи нурмуһәммәт тохтиниң кимликидинму хәвәрсизликини баян қилса, йәнә бәзилири очуқ һалда бу һәқтә учур берәлмәйдиғанлиқини баян қилди.

Мәрһумниң тәрҗимиһалида дейилишичә, у йәнә бир мәһәл шинҗаң язғучилар җәмийитиниң кәспий язғучиси болуп ишлигән. Шуңа биз мәрһумниң өлүми һәққидә хотән валий мәһкимисиниң мәдәнийәт тармақлиридинму мәлумат соридуқ. Мәдәнийәт ядикарлиқлири идарисиниң қоғдаш хадими өзлиригә язғучи нурмуһәмәт тохтиниң өлүми һәққидә һечқандақ учурниң берилмигәнликини ейтти.

Мәлум болушичә, язғучи нурмуһәммәт тохтиниң канадада яшаватқан зоригүл исимлик бир қизи бар болуп, униң нәвриси түнүгүн уйғурназ намидики фейсбук бетидә бовиси нурмуһәммәт тохтиниң өлүми һәққидә учур бәргән. Учурда дейилишичә, мәрһумниң канададики қизи вә нәврисиму бу өлүмдин 11 күн кечикип хәвәр тапқан. Бу учурда дейилишичә, мәрһум 2018‏-йили 11‏-айдин 2019‏-йили 3‏-айғичә лагерда ятқан.

Мәлум болушичә, бирқанчә йилдин бери диябит кесилигә гириптар болған язғучи нурмуһәммәт тохти лагердики мәзгилидә 5 айдин артуқ давалиништин мәһрум қалған. Мәрһум маҗалидин пүтүнләй кәткәндин кейин аилисигә қайтурулған вә 5-айниң 31‏-күни һаятидин айрилған. Мәрһумниң канададики бу нәвриси йәнә фейсбуктики учурида хотәндики уруқ-туғқанлириниң лагерға солиниш хәвпи түпәйли өзлиригә бовисиниң өлүми һәққидә вақтида учур берәлмигәнлики вә учур йәткүзгәндиму тәпсилий җәрянлар һәққидә тохталмиғанлиқини ашкарилиған.

Хотән вилайәтлик мәдәнийәт идарисиниң катипи язғучи нурмуһәммәт тохтиниң аталмиш «тәрбийәләш мәркизи» дин қачан қоюп берилгәнлики һәққидики соалимизға бир ай бурун дәп җаваб бәрди. Әмма у мәрһумниң өлүм сәвәби һәққидә учур беришни рәт қилди.

Юқириқи учурлардин мол-һосуллуқ язғучи нурмуһәммәт тохтиниң өткән йилиниң ахирида кесәл һалитидә лагерға әкитилгәнлики, кесили беқишсиз қелип еғирлашқандин кейин аилисигә қайтурулғанлиқи вә лагердин чиқип бир айдин кейин һаятидин айрилғанлиқи мәлум болмақта.

Пикирләр (0)
Share
Толуқ бәт