Обулқасим давут, даириләрниң һамилдар аялиға қарита бала чүшүрүш буйруқини рәт қилғанлиқи үчүн еғирлитип кесилгән

Мухбиримиз шөһрәт һошур
2021-02-20
Share
Обулқасим давут, даириләрниң һамилдар аялиға қарита бала чүшүрүш буйруқини рәт қилғанлиқи үчүн еғирлитип кесилгән Даириләрниң һамилдар аялиға қарита бала чүшүрүш буйруқини рәт қилғанлиқи үчүн еғирлитип кесилгән обулқасим давутниң кимлик карти.
Photo: RFA

Қәшқәрдә мәшрәп ойнап тутулған 14 кишидин бирси болған, вилайәтлик почта-телеграф идарисиниң инженери обулқасим давут, пиланлиқ туғутқа хилаплиқ қилғанлиқи үчүн, биллә тутулған достлириға нисбәтән еғирлитип кесилгән. Мәлум болушичә, обулқасим давут, он йилниң алдида даириләрниң аялиға қаратқан бала чүшүрүш буйруқини рәт қилип, пландоин сирт үчинчи пәрзәнтиниң дуняға келишигә йол ачқанлиқи үчүн, 17 йиллиқ кесилгән.

Қәшқәргә қаратқан телефон зиярәтлиримиз давамида, көпинчә хадимлар, шәһәрдики алақидар аһалиләр комтетиниң аманлиқ хадими обулқасим давутниң 2017 ‏-йилдин буян қамақта икәнликидин хәвири барлиқи, әмма кесилгән-кесилмигәнликидин хәвәрсизликини ейтти. Йәнә бир хадим, обулқасим давут вә достлириниң мәшрәп ойниғанлиқи үчүн тутулғанлиқини дәлиллиди. Әһвалдин хәвәрдар кишиләрдин бириниң баян қилишичә, обулқасим давут сорақтики мәзгилидә, өзиниң мәшрәп ойниғандин башқа хаталиқ садир қилмиғанлиқини баян қилған болсиму, әмма сорақчилар униңдин йәниму көп мәсилә тапшурушини тәләп қилған вә сорақни алтә айға қәдәр ахирлаштурмиған. У ахири 10 йил аввал өткүзгән вә җазасини өтәп болған бир аталмиш хаталиқини қайтидин оттуриға қойған. Мәлум болушичә, обулқасим давут вә аяли, 3 ‏-пәрзәнти туғулуштин бурун даириләр тәрипидин һамилини чүшүриветиш һәққидә буйруқ тапшурувалған. Обулқасим бала чүшүрүшни рәт қилған. Бу сәвәбтин у әйни чағда берилгән иқтисадий җазани толуқ төлигән. Бу қетимқи сорақта, у 10 йил аввалқи бала чүшүрүш буйруқини рәт қилғанлиқини өзидики диний әсәбийликниң аламити дәп етирап қилишқа мәҗбур болған.

Биз обулқасим давутниң делосиниң пиланлиқ туғут билән мунасивити бар-йоқлуқини ениқлаш үчүн, қәшқәр шәһәрлик пиланлиқ туғут идарисиға телефон қилдуқ. Бу бөлүм хадими сөзлишишимизни тәвсийә қилған алақидар бир хадимдин мәлумат соридуқ. У, обулқасим давутниң делосиниң пиланлиқ туғут биләнму алақидар икәнликини дәлиллиди.

Әһвалдин хәвәрдар кишиниң баян қилишичә, обулқасим давут әслидә пиландин сирт туғулған балиси үчүн 10 йили аввал җәриманә төләп болғаникән, бу қетим обулқасим мәзкур қилмишини диний әсәбийликниң аламити дәп дәп етирап қилғини үчүн, даириләр униңға қайтидин 90 миң йүән җәриманә қойған. Обулқасим давутниң аяли, бу җәриманини төләш билән җорисиниң қоюп берилишини күтүп мәзкур җәриманини толуқ төлигән болсиму, уни йәнила түрмигә йоллиништин сақлап қалалмиған.

Обулқасим давут кейинки иқрариниң нәтиҗисидә, униң "мәшрәп ойнап җамаәт тәртипини бузуш җинайити" гә, "диний әсәбийлик җинайити" му қетилип 17 йиллиқ кесилгән.

Әһвалдин хәвәрдар киши обулқасим давутниң нөвәттә, қорғас наһийәсиниң қошериқ түрмисидә җаза муддитини өтәватқанлиқини мәлум қилди, әмма бу учур сақчилар тәрипидин техи дәлилләнмиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт