Norwégiye paytexti osloda béyjing olimpikini bayqut qilish namayishi ötküzüldi

6-Ayning 23-küni norwégiye paytexti oslo shehiride 2022-yilliq béyjing qishliq olimpik tenherket musabiqisini bayqut qilish we uninggha naraziliq bildürüsh namayishi ötküzülgen. Namayishni norwégiye Uyghur komitéti teshkillige.

Norwégiye paytexti osloda ötküzülgen mezkur namayishqa norwégiye Uyghur komitétidin bashqa norwégiye tibet komitéti we norwégiye xongkong komitéti qatarliq teshkilatlarmu qatnashqan bolup, namayish jeryanida herqaysiy teshkilatlarning mes'ulliri söz qilghan.

Bu namayish oslodiki norwégiye olimpik binasining aldida ötküzülgen bolup, jiddiy shekilde élip bérilghan bu namayishqa norwégiyening yerlik xelqlirimu ishtirak qilghan.

Namayish bashlinish aldida neq meydandin radiyomiz ziyaritini qobul qilghan norwégiye Uyghur komitétining hey'et ezasi semet abla ependi namayish toghriliq tepsiliy melumat berdi.

Melum bolghinidek, 1894-yili 6-ayning 23-küni qurulghan xelq'ara olimpik komitéti 1987-yiligha kelgende 23-iyun künini “Xelq'ara olimpik küni” dep békitken. Shuningdin buyan her qaysi ellerde olimpik komitétliri bu künni türlük shekildiki pa'aliyetler arqiliq xatirilep kelmekte.

Namayish jeryanida norwégiye Uyghur komitétining mes'ulliridin bextiyar ömer ependi bilen perhat yaqup ependimu ziyaritimizni qobul qilip, namayish heqqide melumat berdi.

Béyjing da'iriliri sahibxanliq qilmaqchi bolghan 2022-yilliq qishliq olimpik tenherket yighini “Irqiy qirghinchiliq olimpiki” dep atiliwatqan bolup, uni bayqut qilish we uninggha qarshi turush üchün her qaysi ellerde bir tutash we keng kölemlik naraziliq namayishliri élip bérilmaqta.