3-Qétimliq "Robot körgezmisi" pa'aliyiti istanbulda ötküzüldi

Ixtiyariy muxbirimiz éhsan
2021-09-21
Share
3-Qétimliq Türkiyediki "UyghurSTEM Guruppisi" ning orunlashturushi bilen ötküzülgen Uyghur yash-ösmürlerning 3-qétimliq robot körgezmisirdin bir körünüsh. 2021-Yili 19-séntebir. Istanbul, türkiye.
RFA/Erkin Tarim

19-Séntebir küni, türkiyediki "UyghurSTEM Guruppisi" ning orunlashturushi bilen Uyghur yash-ösmürlerning 3-qétimliq robot körgezmisi istanbul siyaset, iqtisad we jem'iyet tetqiqat instituti(SETA) ning yighin zalida daghdughiliq ötküzüldi.

UyghurStem-Robot-Korgezmisi-2021-01.jpg

Mezkur pa'aliyetke türkiyediki Uyghur perzentliri, ata-anilar, teshkilat mes'ulliri we Uyghur ziyaliyliri qedem teshrip qildi.

Pa'aliyette "UyghurSTEM Guruppisi" ning robot we kompyutér bilimliri kursidin oqughuchilar özliri yasap chiqqan téxnika eserlirini tonushturdi.

Uyghur ösmürlirini élim-pen we téxnika jehettin terbiyeleshning muhimliqi Uyghur ziyaliyliri teripidin tekitlinip kelmekte.

UyghurStem-Robot-Korgezmisi-2021-02.jpg

Mezkur pa'aliyetke qatnashqan Uyghur akadémiyesining re'isi perhat qurban tengritaghli ependim ziyaritimizni qobul qilip, pa'aliyetke qatnashqan ata-anilarning bu pa'aliyetning ehmiyitini chongqur hés qilghanliqidin söyün'genlikini, bu xil pa'aliyetlerning yash ösmürlerning ösüp yétilishi üchün intayin paydiliq ikenlikini, bu xil pa'aliyetlerning téximu köp ötküzülüshi üchün tilekdash ikenlikini éytti.

Türkiyediki "UyghurSTEM Guruppisi" Uyghurlar arisida tebi'iy pen, téxnika qizghinliqini qozghash, yash-ösmürler arisida robot, we ilim-pen bilimlirini omumlashturush meqsitide 2019-yili memtimin nuridin teripidin qurulghan bolup, qurulghandin étibaren STEM ma'aripi endizisi boyiche kompyutér, robot, programma tilliri, matématika, fizika we bashqa tebi'iy penler boyiche oqughuchilargha ders bérip kelmekte. "UyghurSTEM Guruppisi" qurulghandin buyan kompyutér programma tilliri we robot dersliri boyiche, 350 ke yéqin oqughuchi terbiyeligen. "UyghurSTEM Guruppisi" ning qurghuchisi memtimin nuridin ziyaritimizni qobul qilip, pa'aliyetliri heqqide tepsiliy melumat bérip mundaq dédi:

UyghurStem-Robot-Korgezmisi-2021-03.jpg

"Biz dawamliq halda tebi'iy pen, matématika, kompyutér programma bilimliri heqqide balilarni asas qilghan, chonglarnimu öz ichige alghan ders we pa'aliyetlerni orunlashturup, Uyghur ösmürliri üchün bilim, téxnika öginidighan we ortaqlishidighan bir supa shekillendürüshke tirishimiz. Biz robot we programma tilliri öginish qizghinliqini Uyghur balilar arisida bir éqim halitige keltürüshke, tebi'iy pen derslirimiz arqiliq ilim-pen heweskarlirini köpeytishke, téxnika körgezmilirimiz arqiliq balilar özlirini namayan qilidighan sehne hazirlap bérishke tirishiwatimiz."

UyghurStem-Robot-Korgezmisi-2021-04.jpg

Mezkur pa'aliyette eserliri körgezme qilin'ghan yash ösmürlerdin UyghurSTEM kompyutér programma tilliri we robot kursining oqughuchisi zehra ziyaritimizni qobul qilip, pa'aliyet heqqidiki tesiratlirini biz bilen ortaqlashti.

Uyghur ziyaliyliri muhajirettiki Uyghurlarning téxnika we élim-pen jehettin terbiyelinishining, Uyghurlarning nöwettiki siyasiy ehwaligha hel qilish charisi tépish we Uyghurlarning milliy mewjutluqini qoghdash jehettin intayin muhim ikenlikini tekitlep kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet