Istanbuldiki “Palwan Uyghur yashlar merkizi” türkiyediki Uyghur yashlirigha ümid we ishench bermekte

Palwan yashlar merkizidiki Uyghur yashlirining resim we sen'et körgezmisidin bir körünüsh. 2023-Yili iyul, istanbul.

Uyghur yash semerjan se'idi bashchiliqida istanbulning sefaköy rayonida qurulghan “Palwan Uyghur yashlar merkizi” türkiyediki Uyghur yashlirigha ümid, jasaret we özini terbiyelesh pursiti ata qilmaqta.

Uyghurlar köp olturaqlashqan rayonlardin biri bolghan istanbul sefaköy rayonida Uyghur yash semerjan se'idi bashchiliqida qurulghan “Palwan Uyghur yashlar merkizi” yéqinqi yillardin buyan istanbulda yashawatqan Uyghur yashliri we aliy mektep oqughuchilirini uyushturup, tenterbiye, resim we sen'et, türlük hüner-kesip, projékt ishlesh, in'glizche öginish, shundaqla matématika qatarliq tebi'iy penlerdin toluqlima kurs uyushturush, söhbet we dala seylisi qatarliq pa'aliyetlerni élip barmaqta. “Palwan Uyghur yashlar merkizi” ning bu bir qatar pa'aliyetliri istanbuldiki Uyghur yashlirining hayatigha yéngiliq we güzellik qoshmaqta, derdige derman bolmaqta.

RFA/Uyghar

Radiyomizning ziyaritini qobul qilghan semerjan se'idi sözide, 2019-yili Uyghur yashlirining zörür éhtiyaji bolghan bir a'ile muhitini yaritish üchün, istanbuldiki shara'iti nacharraq bir öyni özining we dostlirining tirishchanliqi bilen kiralap bir boks kulubini achqanliqini, kéyinche amérikadiki “Uyghur ewladliri projékti” (Uyghur NextGen) ning yardimi bilen shara'iti yaxshi bolghan hazirqi “Palwan Uyghur yashlar merkizi” ni achqanliqini tilghan aldi. U bu merkezni échishtiki asasliq meqsitining uniwérsitétqa teyyarliq qiliwatqan yashlargha yol körsitish, Uyghur yashlirini özining qiziqishi we talanti bolghan sahelerge yéteklesh we ulargha purset we muhit yaritip bérish ikenlikini alahide tekitlidi.

RFA/Uyghar

“Palwan Uyghur yashlar merkizi” ning mes'ulliridin biri bolghan idris ayasmu ziyaritimizni qobul qilip, boks kulubida yashlarning bir tereptin beden chéniqturup keypiyatini yaxshilap, jismaniy we rohiy jehettin özini küchlük qilidighanliqini, yene bir tereptin ders kurslirigha qatniship uniwérsitétqa teyyarliq qilidighanliqini, omumen éytqanda bu merkezning ümid we tereqqiyatning simwoli ikenlikini qeyt qildi.

“Palwan Uyghur yashlar merkizi” de güzel sen'et oqutquchisi bolup ishlewatqan züleyxa abdul radiyomizgha qilghan sözide, bu merkezde özining rolini jari qildurup yashlargha yardem qilghan bolsa, yene bir tereptin bashqa ustazlardin öginip özining bilimini ashuruwatqanliqini éytti.

RFA/Uyghar

“Palwan Uyghur yashlar merkizi” de pirogramma we pa'aliyetlerge aktip qatnishiwatqan Uyghur yashliridin bir bolghan medine muhemmet ziyaritimizni qobul qildi. U sözide, bu merkezde qisqa waqit ichide yuqiri sewiyede milliyche resimlerni sizishni öginip, körgezmilerge qatniship yaxshi netijilerge érishkenlikini bildürdi.

Axirda, semerjan se'idi “Palwan Uyghur yashlar merkizi” de terbiyelinip chiqqan yashlarning kelgüside muhajirettiki Uyghur jem'iyiti üchün töhpe qoshushni ümid qilidighanliqini tekitlidi.