AP
Ғулҗа баяндай вәзийитидин хәвәрдар кишиләрдин бири радийомизға учур йоллап, баяндайда ашхана ечиватқан султанҗан исимлик бир кишиниң аилиси бойичә тутқун қилинғанлиқи, униң акиси савурҗанниң мисирда ашхана ачқан икки оғлиниңму «тәрбийәләш» тә икәнликини билдүргән иди.
Бу һәқтики ениқлашлиримиз давамида, мәзкур аилиниң әһвали айдиңлашмиған болсиму, баяндай йезисидин бултур йил оттуридин башлап «һиҗрәткә тәйярлиқ қилған» дегән гуман билән 3 кишиниң тутулғанлиқи ашкариланди.
Илгири райондин игилигән учурлиримиздин ашкарилинишичә, йеқинқи йиллардин бери миңлиған кишиләр һәр хил йоллар билән чегра атлап чиқип кетәлигән болсиму, йәнә көплигән кишиләрниң сәпәр үстидә, һәтта өйидин қозғалмай туруп тутулғанлиқи вә уларға «һиҗрәтчи» дегән бир аталмиш җинайәт артилғанлиқи ашкариланған иди.
Сабиқ мәһбуслардин бири өзиниң пакистандин қайтуруветилгән 40 нәччә киши билән бир қамақханида ятқанлиқини билдүргән болса, йәнә бәзи кәнт аманлиқ мудирлири өзлириниң хитай өлкилиридин «һиҗрәткә атланған» уйғурларни тутуп келиватқанлиқини өз еғизи билән ашкарилиған иди.
Вәзийәттин хәвәрдар кишиләрниң баян қилишичә, һиҗрәткә тәйярланғанларни паш қилиш йеқини йиллардин бери йезилардики бәзи аманлиқ мудирлири үчүн хизмәт көрситиш йоллиридин биригә айланған.
Баяндайдики юқириқи аманлиқ мудири чәтәлгә чиқиш койидики3 кишини тутуп бәргини вә 30 кишиниң тутулушиға йол ечип бәргини үчүн икки қетим мукапатланған. Әмма «йепиқ тәрбийә» долқунида униң бу көрсәткән хизмити етибарға елинмиған. Униң ака-укилириниң вә аялиниң қериндашлириң пәрзәнтлиридин болуп 5 киши «тәрбийәләш» кә әкетилгән.
