Rozinisa memettoxti: "Öz a'ilemdikilerning ehwalini 'qaraqash höjjetliri' din bildim"

Muxbirimiz gülchéhre
2020-02-20
Élxet
Pikir
Share
Print
Türkiyede yashawatqan qaraqashliq rozinisa memettoxti axbaratlargha "Qaraqash höjjetliri" ge kirgüzülgen uruq-tughqanliri heqqide guwahliq bériwatqan körünüshlerning biri. 2020-Yili yanwar.
Türkiyede yashawatqan qaraqashliq rozinisa memettoxti axbaratlargha "Qaraqash höjjetliri" ge kirgüzülgen uruq-tughqanliri heqqide guwahliq bériwatqan körünüshlerning biri. 2020-Yili yanwar.
Rozinisa teminligen

"Qaraqash höjjetliri" dep atalghan yéngidin ashkarilan'ghan 137 betlik bu höjjet xotenning qaraqash nahiyesige qarashliq bostan ijtima'iy rayondiki 650 din artuq a'ilige chétishliq 3000 dek kishining arxipi iken.

Uningda bu teweliktiki puqralarning diniy étiqadi, kündilik turmushi, yürüsh-turushi, ipadisi, xaraktéri, kimlik nomuri, kespiy, chet'eldiki a'ile ezalirining ismi, yéqin qolum-qoshniliri we ular bilen bolghan alaqisi, bu a'ililerning ichidin tutqun qilinip, lagérgha qamalghan we késilgen kishilerning isimliri, ularning qamilish, késilish we lagérlargha qayta ewetilish sewebi qatarliq nurghun inchike tepsilatlar xatirilen'gen iken.

3 Yérim yildin buyan yurti qaraqashtiki a'ilisi bilen alaqisi pütünley üzülgen istanbuldiki 3 balining anisi rozinisa memettoxti Uyghur ziyaliysi abduweli ayupning ijtima'iy taratqularda terjime qilip tarqatqan "Qaraqash höjjetliri" diki 358-nomurluq arxiptin öz singlisi patem memettoxtining lagérda ikenlikini bilgen. U yene sh höjjetlerdiki 597-nomurluq arxiptin hedisi roziniyaz memettoxtining 10 yil késilgenlikini bilidu. Hetta rozinisa özining ismi we uning chet'elge chiqip ketkenlikimu singlisi patem heqqidiki 358-nomurluq arxipqa yézilghan.

Mezkur höjjet xitay tashqi ishlar ministiri wang yi gérmaniyening myunxén shehiride jaza lagérlirining mewjutluqini inkar qilip, arqidinla élan qilindi. Bu höjjet dunya jama'etchilikige xitayning Uyghur rayonidiki jinayi qilmishlirigha da'ir muhim delillerni teminlidi. "Qaraqash höjjetliri" diki lagérdikilerning arxiplirida yene Uyghurlarning namaz oqughanliqi, tebligh anglighanliqi, saqal qoyghanliqi, hijablan'ghanliqi, pasport alghanliqi, chet'elge chiqqanliqi we diniy yüzlinishi seweblik tutqun qilin'ghanliqi xatirilen'gen. Bu höjjetlerde yene tutqunlarning yuqiriqi atalmish "Jinayet" lirining ularning tutqun qilinip, lagérlargha qamilishi yaki késilishige yéterlik "Jinayi delil" dep qaralghanliqi éniq körsitilgen. Höjjettiki 358-nomurluq arxipta patem memettoxtining pilandin artuq bir bala körgenliki seweblik 2018-yili 3-ayning 8-küni qaraqash 4-lagérgha qamalghanliqi ashkara bolidu.

Rozinisa "Qaraqash höjjetliri" dep atalghan bu höjjetlerdin singlisi patemdin bashqa yene 597-nomurluq höjjettin öz hedisi roziniyaz memettoxtining türmide ikenlikidin xewer tapidu.

Toluq bet