Түркийәдин қайтурулған зиннәтгүлниң аписиниң тутқунда икәнлики, инисиниң аилисидә кесәл икәнлики ашкариланди

Мухбиримиз шөһрәт һошур
2020-08-03
Share
zinnetgul-we-2-balisi.jpg Зиннәтгүл турсунниң түркийәдә турушлуқ иқамәт кинишкиси вә икки пәрзәнти.
Social Media

Түркийәдин қайтурулған вә қамақта түгәп кәткәнлики илгири сүрүлгән зиннәтгүлниң әһвали һәққидә йәниму илгириләп елип барған ениқлашлиримиз давамида униң аписиниң 9 айдин бери лагерда икәнлики, инисиниң болса лагерда еғир кесәлгә муптила болғанлиқи үчүн қоюветилгәнлики, әмма аилисидә қарайдиған киши қалмиғачқа беқишсиз қалғанлиқи ашкариланди.

Түркийәдин таҗикистан арқилиқ хитайға қайтурулған зиннәтгүлниң сәуди әрәбистандики һәдиси гүлҗәннәт сиңлиси һәққидә қорқунчлуқ учур алғандин кейин, учурниң тоғра-хаталиқини айдиңлаштуруш үчүн бирқанчә айдин бери алақә қилип бақмиған аписи рошәнгүл ясинға телефон қилған; әмма һәптиләрчә қилған телефони бағланмиған. Шундақтиму у зиннәтгүл һәққидә алған учурда икки балисиға аниси рошәнгүлниң қараватқанлиқи әскәртилгәнлики үчүн анисиниң әһвалидин бәк әндишә қилип кәтмигән. Әмма ениқлашлиримиз давамида алақидар сақчи хадимлири зиннәтгүлниң аниси һәққидики соаллиримизға җаваб бериштин өзини қачурди. Биз бу сақчи хадими тәминлигән телефон номури бойичә, йезидики бу әһвалдин хәвәрдар икки кәнт кадири билән алақиләштуқ. Бу хадимлар зиннәтгүлниң аниси рошәнгүл ясинниңму 9 айдин бери тутқунда икәнликини ашкарилиди. Әмма кәнт хадимлири рошәнгүлниң немә үчүн тутулғалиқи һәққидә учур берәлмиди. Телефонимизни қобул қилған йәнә бир хадим, рошәнгүлниң тутулушида униң илгирики түркийә сәпириниң сәвәб болғанлиқини ишарәтлиди.

Гүлҗәннәтму зияритимиз давамида аписиниң2015- вә 2016-йиллири қануний йоллар билән түркийәгә кәлгәнлики вә өзи вә сиңлиси билән көрүшкәнликини баян қилди. Гүлҗәннәтниң дейишичә, рошәнгүл ясин шу чағда икки қизи билән бир мәһәл түркийәдә яшашни арзу қилған болсиму, юртида қепқалған оғли ибраһимдин әндишә қилип юртиға қайтқан икән. Мәлум болушичә, рошәнгүлниң түркийә сәпири йәрлик даириләргә сир әмәс; униң немә үчүн тутқун кәң көләмдә давам қиливатқан2017- вә 2018-йиллири тутулмай 2019-йили, йәни зиннәтгүл түркийәдин қайтурулуп икки айдин кейин тутқун қилиниши гүлҗәннәтни ойға салмақта. У бу һәқтә сиңлиси зиннәтгүлниң қамақханида еғир қейин-қистаққа елинғанлиқи вә сорақ җәрянида анисиниң түркийә сәпири һәққидә аталмиш бир җинайәткә иқрар қилдурулғанлиқ еһтималлиқини пәрәз қилмақта.

Зиннәтгүлниң аписиниң немә үчүн тутулғанлиқи вә нәдә тутуп турулуватқанлиқи һәққидә әһвал ениқлашлиримиз давамида зиннәтгүлниң иниси ибраһимниңму икки йил бурун тутуп кетилгән лагердин еғир кесәл һаләттә аилисигә қоюп берилгәнлики, әмма аилисидә адәм қалмиғачқа, униң кесәл һаләттә беқишсиз қалғанлиқи ашкариланди. Демәк, нөвәттә из-дерики мәлум болмайватқан зиннәтгүлниң сүйдуңдики аилисидин аниси рошәнгүл ясин қамақта, икки балиси чоң аписиниң қолида беқишта, лагердин кесәл чиққан иниси ибраһим өйидә беқишсиз һаләттә йетиқта. Нөвәттә сәуди әрәбистанида яшаватқан гүлҗәннәт из-дерики болмайватқан сиңлиси, қамақтики анисиниң ғеимидин башқа йәнә лагердин кесәл чиққан инисиниң саламәтлик вә иқтисадий әһвалидинму әндишә қилмақтикән.

Юқирида түркийәдин таҗикистан арқилиқ қайтурулған зиннәтгүлниң аписиниң тутқунда икәнлики, лагердин кесәл чиққан инисиниң аилисидә беқишсиз қалғанлиқи һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт