Qedriye ghopurning toqsudiki anisi hajire rozining tutqunda ikenliki delillendi

Muxbirimiz shöhret hoshur
2020-03-12
Élxet
Pikir
Share
Print
Guwahliq bayanatliri türkler arisida qiziqish qozghighan qedriye ghopurning anisi hajire rozi xanim.
Guwahliq bayanatliri türkler arisida qiziqish qozghighan qedriye ghopurning anisi hajire rozi xanim.
Qedriye Ghopur Teminligen

Anisi heqqidiki bir yürüsh guwahliq bayanatliri bilen türkler arisida küchlük diqqet qozghighan norwégiyediki qedriye ghopur özining guwahliq bayanatlirida anisining 10 yilliq késilip ketkenliki we nöwette toqsu türmiside ikenlikini bayan qilghan idi. Muxbirimizning toqsudiki alaqidar orunlargha qarita élip barghan téléfon ziyaretliri dawamida hajire rozining tutqunda ikenliki xizmet orni teripidin delillendi. Qediriye özining tesirat bayanatida guwahliq bayanatlirining anisini qutuldurush üchün qilidighan ishlirining bashlan'ghuchi ikenlikini eskertti

Norwégiyediki qediriye ghopurning guwahliq bayanatida uning anisining toqsu medeniyet idarisining boghaltiri ikenliki we 10 yilliq késiwétilgenliki tilgha élin'ghan idi. Toqsu nahiyelik sot mehkimisi xadimliri deslepte bu heqtiki so'alimizni jawabsiz qaldurdi. Arqidin özlirining barliq mehkumlarning kimlikini este tutalmaydighanliqini bildürüp, bu heqte melumati yoqluqini éytti. Qediriye ghopur anisi heqqidiki uchurni ishenchlik menbelerdin alghanliqini, emma menbening kimlikini ashkarilashqa bolmaydighanliqini éytqan idi.

Toqsu nahiyelik medeniyet idarisining bir xadimi hajire rozining qanche yil késilgenliki heqqidiki so'alimizgha jawab bérishte ikkilendi. U arqidin bu so'alimizgha munasiwetlik xadimlardin melumat élip jawab béridighanliqini éytti. Emma hajire rozining késilgenlik uchurini inkar qilmidi.

Qediriye ghopurning bir guwahliq bayanatida déyilishiche, u anisining bixeterlikini közde tutup, türkiyede oqughan we yashighan 6 yil dawamida xitaygha qarshi héchqandaq bir söz heriketlerde bolmighan. U bayanatida özining ötmüshtiki bu éhtiyatchanliqigha pushayman qilghanliqi we bu pushaymandin chong bir ders alghanliqini bildürgen.

Biz söhbitimiz dawamida uning türkiyediki 6 yilliq hayati dawamida ana wetinide yurtdashliri körüwatqan zulumni ashkarilimighanliqi üchün idiye we héssiyat jehettin bir toqunush ichide bolghan yaki bolmighanliqini soriduq. U özining bundaq bir toqunushta bolghanda anisi ögetken himmetlerge asasen könglige teselli tapqanliqi we kéyinki yillarda öz kespi arqiliq millitige xizmet qilishni könglige pükkenliki, emdilikte bolsa özide yene bashqa alahidiliklernimu bayqighanliqi hemde buningdin kéyinki hayat yolida kespiy sahedila cheklinip qalmaydighanliqini ilgiri sürdi.

Axirida téléfonimizni qobul qilghan toqsu medeniyet idarisining yene bir xadimi hajire ghopurning qolgha élinip bolghanliqini ashkarilash arqiliq uning tutqunda ikenliki heqqidiki uchurning toghriliqini delillidi.

Qediriye ghopur söhbitimizning axirida özining guwahliq bayanatliri qiziqish qozghighan bolsimu, téxi közligen meqsitige yetmigenliki, bu bayanatlarning u ning anisini qutuldurush üchün qilidighan ishlirining bashlan'ghuchi ikenlikini eskertti.

Toluq bet