ب د ت باش كاتىپى بان كىمۇن ئىنسان ھەقلىرى مەسىلىسىدە ئۆزىنى ئاقلىدى

دۇنيا كىشىلىك ھوقۇقنى كۆزىتىش تەشكىلاتى دۈشەنبە كۈنى ئېلان قىلغان يىللىق دوكلاتىدا، ب د ت باش كاتىپى بان كىمۇننى، ئىنسان ھەقلىرى مەسىلىسىدە چىڭ تۇرمىدى دەپ تەنقىد قىلغان ئىدى. بۈگۈن باش كاتىپ بان كىمۇننىڭ باياناتچىسى بۇ ھەقتە سۆز قىلىپ، بان كىمۇننىڭ ئىنسان ھەقلىرى مەسىلىسىدە خىزمەت ئۇسلۇبىنىڭ باشقىچە ئىكەنلىكىنى، يەنى دىئالوگ ۋە ھەمكارلىقنى ئاساسى ۋاسىتە قىلغانلىقىنى بىلدۈرگەن.
مۇخبىرىمىز شۆھرەت ھوشۇر
2011-01-25
Share

ئىنسان ھەقلىرى پائالىيەتچىلىرى بان كىمۇننىڭ ئۇسلۇبىنى تولىمۇ يۇمشاق ۋە ھەددىدىن زىيادە ئېھتىياتچان دەپ تەنقىد قىلماقتا. بان كىمۇننىڭ باياناتچىسى "ئەمەلىي نەتىجىلەر بان كىمۇننىڭ ئۇسلۇبىنىڭ ئۈنۈملۈك ئىكەنلىكىنى كۆرسەتتى" دېگەن.

دۇنيا كىشىلىك ھوقۇقنى كۆزىتىش تەشكىلاتىنىڭ دوكلاتىدا، بان كىمۇننىڭ ئۆزبېكىستان ۋە تۈركمەنىستان قاتارلىق دۆلەتلەرنى زىيارەت قىلغاندا ئىنسان ھەقلىرى مەسىلىسىنى نىسبەتەن قاتتىق تەكىتلەپ، خىتايغا ئوخشاش چوڭ ئىنسان ھەقلىرى پاجىئەلىرى داۋام قىلىۋاتقان دۆلەتلەرنى زىيارەت قىلغاندا ئاۋازىنىڭ پەسلەپ كەتكەنلىكىنى، ھەتتا چىقماي قالغانلىقىنى بىلدۈرگەن.

بان كىمۇننىڭ 5 يىللىق ۋەزىپە مۇددىتى مۇشۇ يىل 12 ‏-ئاينىڭ 31 ‏-كۈنى ئاخىرلىشىدۇ، شۇڭا بەزى كۆزەتكۈچىلەر، بان كىمۇننىڭ ئىككىنچى قېتىم يەنە ۋەزىپىگە ئولتۇرۇش تەمەسىدە ئىكەنلىكىنى، ۋەزىپىگە ئولتۇرۇشتا خىتاينىڭ قوللىشىغا ئېرىشىش ئۈچۈن، ئۆتكەن يىلى خۇ جىنتاۋ بىلەن كۆرۈشكەندە ئىنسان ھەقلىرى مەسىلىسىنى تىلغا ئالمىغانلىقىنى ئوتتۇرىغا قويغان ئىدى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت