Гуәнтанамодики уйғурлардин үч нәпири палавға беришни қобул қилди

Гуәнтанамода қалған 13 нәпәр уйғурниң үч нәпири палавға беришни қобул қилған. Бирләшмә агентлиқиниң хәвәр қилишичә, америка ташқи ишлар министирлиқиниң бир әмәлдари 3 нәпәр уйғурниң бир айлиқ сөһбәттин кейин палавға беришни қобул қилғанлиқини билдүргән. Әмма бу һәқтә техиму әтраплиқ мәлумат беришни рәт қилған.
Мухбиримиз ирадә
2009.09.10

Гуәнтанамодики уйғур мәһбусларниң адвокати җорҗ кларк бирләшмә агентлиқиниң мухбириға бәргән мәлуматида, "мән адвокатлиқини қиливатқан уйғурлардин икки нәпири палавға беришни қобул қилди, улар гуәнтанамодин балдуррақ айрилип, палавда өзлиригә йеңи бир һаят қурушни һаяҗан ичидә күтмәктә," дегән.

Йәнә бир адвокат ерик тиришвелму мухбирларға: "мән адвокатлиқ қиливатқан 4 нәпәр уйғурдин 1 нәпириму палавға беришқа қошулди. У 8 йил аридин кейин әркинликтин бәһриман болушни күтмәктә," дегән.

Бу үч нәпәр уйғурниң әң кәч болғандиму өктәбирниң ахирилирида палавға берип болидиғанлиқи ипадә қилинмақта. Әмма америкиниң палавда турушлуқ юқири дәриҗилик әмәлдари марк безнер өзиниң техи америка даирилиридин бу һәқтә рәсмий бир хәт тапшуруп алмиғанлиқини билдүргән.

Хитай ташқи ишлар министирлиқиниң баянатчиси җяң йү чаршәнбә күни ахбарат елан қилиш йиғинида бу һәқтә тохтилип, "биз һәр қандақ дөләтниң уларни қобул қилишиға қәтий қарши. Бу уйғурлар бизгә қайтуруп берилиши керәк, дегән.

Америка һазир қалған 10 нәпәр уйғурға баридиған дөләт издимәктә. Бундин аввалму гуәнтанамоға қамалған уйғурлардин 5 нәпири албанийигә, 4 нәпири арал дөлити бермудаға орунлаштурулған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.