Явро асия йәрмәнкиси мәзгилидә, үрүмчидә көктат базарлири тақилип, яймикәшләр қоғливетилди

Үрүмчидә 1-сентәбирдин 5-сентәбиргичә ечилидиған явро-асия йәрмәнкиси мәзгилидә, йәрмәнкә ечилидиған районда җиддий бихәтәрлик тәдбирлири елинип, йәрмәнкә әтрапида тиҗарәт қилидиған барлиқ көктат дуканлири тақалди.
Мухбиримиз меһрибан
2011.08.30

Базардики йәккә тиҗарәтчиләргә дуканлирини бир һәптигичә ачмаслиқ уқтуруши чүшүрүлүп, базардики яймикәшләр қоғливетилди.

Бирнәччә күндин буян, тор бекәтлиридә явро-асия йиғини һәм мусулманларниң роза һейти мәзгилидә үрүмчи вәзийитиниң җиддийләшкәнлики һәққидә йезилған наразилиқ инкаслири барғанчә көпәйгән.

Синна тор бекитидики бир инкаста үрүмчи вәзийити һәққидә “һөкүмәт йәрмәнкә ачимиз дәп, роза һейт мәзгилидә пуқраларни көктатсиз қоюватиду.

Аманлиқ дәп үрүмчи асминида тик учар назарәт қиливатиду. Кочида маңғанларни назарәт қилип, пуқраларни өйдә олтурушқа зорлаватиду.

Кочиға қарайдиған деризиләрни тақашқа буйруп, пуқраларни димиқ иссиқта өлтүрәй дәватиду. Әҗәба һөкүмәт бундақ қилғансери пуқраларниң наразилиқи күчийип, йәнә вәқә чиқишидин қорқмамдикинә?” дейилгән.

Үрүмчидин радиомиз зияритини қобул қилған пуқраларниң билдүрүшичә, үрүмчи йәрмәнкиси ечиливатқили он нәччә йил болған болсиму, әмма бу йил һөкүмәт даирилириниң йәрмәнкә мәзгилидә бу қәдәр қаттиқ бихәтәрлик тәдбирлири елип, пуқраларниң нормал паалийәтлиригә чәклимә қоюши, үрүмчи аһалисидә бихәтәрлик туйғуси әмәс, әксичә техиму зор вәһимә пәйда қилип, шәһәр вәзийитидә һәрқандақ вақиттикидинму җиддий кәйпият шәкилләндүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.