Қәшқәр вәзийити җиддийләшти

Мәлум болушичә, икки күндин буян қәшқәргә киридиған йоллар қамал қилинғанлиқи үчүн, қәшқәрдә көктат қатарлиқ йемәкликләрниң баһаси көрүнәрлик өрлигән. Һөкүмәт даирилири рамзан мәзгилидә ресторанларни ечишни тәләп қилған болсиму, әмма 1-авғуст рамзанниң 1-күнидин башлапла нурғунлиған уйғур ресторан-ашпузуллири, һәтта уйғур баққаллири күндүзи тиҗарәтни тохтатқан.

Қәшқәрдики ваң вә лияң фамилилик икки хитай пуқрасиниң сәйшәнбә күни радиомизға билдүрүшичә, икки күндин буян қәшқәр кочилирини қораллиқ сақчилар қаплиған, сақчилар нуқтилиқ һалда уйғурларни тәкшүрүш обйекти қилған.

Қәшқәрдики хитай пуқралири арисида вәһимә күчәйгән болуп, дүшәнбә күни кечә саәт 10дин кейин қоллириға тоқмақ көтүргән бир қисим хитай пуқралири қәшқәр шәһиридики мәйданға топлинип, һөкүмәттин қәшқәрдики хитай пуқралирини қоғдашни тәләп қилған.

Нурғунлиған хитай пуқралири әгәр җиддий иши болмиса сиртқа чиқмиған, сирттин қәшқәргә ишләмчиликкә кәлгән хитай ишләмчилириму қәшқәрдин айрилиш тәйярлиқиға чүшкән. Уйғурлар дүшәнбә күнидин башлап роза тутушни башлиқини үчүн, уйғур ашханилири асасән тиҗарәтни тохтатқан.

Дуня уйғур қурултийи баянатчиси дилшат ришитниң радиомизға билдүрүшичә, дүшәнбә күни кечидә хитай пуқралириниң тоқмақ көтүрүп намайиш қиливатқинини көргән ғени турди исимлик бир уйғур яш телефонда башқа уйғурларға учур йоллап, уларни өз бихәтәрликигә диққәт қилишқа агаһландурғини үчүн, кечә саәт 12 әтрапида сақчилар тәрипидин қолға елинған.

Дилшат ришит йәнә нөвәттә қәшқәрдә уйғурларға қаритилған назарәтниң техиму күчәйтилгәнликини тәкитләп, хәлқара җәмийәтни қәшқәр вәзийитигә диққәт қилишқа чақирди.