Xitay rusiyidin tutup qélin'ghan béliqchilirini qoyup bérishni telep qildi

Shinxu'a axbarat agéntliqining xewer qilishiche, xitay mu'awin tashqi ishlar ministiri chén goping peyshenbe küni rusiyining béyjingda turushluq diplomatik emeldarini chaqirtip, rusiye chégra qoghdash qisimlirining xitay béliqchi kémisini topqa tutup, béliqchilirini tutup qalghanliq weqesige qarita“Qattiq memnuniyetsizliki” ni ipadiligen.

Xitayning xabarowéski shehiride turushluq konsulxanisining tor békitide élan qilin'ghan bu heqtiki bayanatta körsitilishiche, rusiye da'iriliri qanunsiz béliq tutqan xitay béliqchilirini tutup qélip, naxodka portigha élip barghan.

Rusiye axbarat wasitilirining ashkarilishiche, seyshenbe küni rusiye su tewelikige kirip, qanunsiz béliq tutqan xitay béliqchiliri rusiye chégra qoghdash qisimlirigha qarshiliq qilghandin kéyin, rusiye terep béliqchilarni topqa tutqan.

Shinxu'a agéntliqi rusiye qisimlirining 19 kishilik yene bir xitay béliqchilar kémisinimu tutup qalghanliqini bildürdi. Chén goping, rusiye diplomatik emeldarigha xitay béliqchilirini téz arida qoyup bérishni telep qilghan. Rusiye diplomatik emeldari bolsa rusiyining weqeni tekshürüwatqanliqi, mumkin bar téz arida xitay terepke uchur béridighanliqini bildürgen.