Лхасаниң “хитайдики әң бәхтлик шәһәр” дәп баһалиниши мәсхиригә учриди

Чәтәлләрдики тибәт тор бекәтлири һәм хәлқара мәтбуатларда, лхаса шәһириниң “2012-йили хитайдики әң бәхтлик шәһәр” дәп баһаланғанлиқиға қарита мәсхирә һәм кинайилик хәвәрләр берилишкә башлиди.

Мухбиримиз меһрибан
2012-08-21

Хитай мәркизи хәлқ телевизийә истансиси 19-авғуст күни өткүзгән “2012-йиллиқ бәхтлик шәһәр башлиқлири мунбири” программисида, лхаса шәһирини хитайдики әң бәхтлик 10 шәһәрниң 1-си, дәп елан қилған. Бу тизимликтә лхаса шәһири, чуңчиң шәһири, тәййүән шәһири вә чаңша шәһири алдинқи 4 қатарға тизилған. Һалбуки бейҗиң, шаңхәй, гуаңҗу қатарлиқ хитайниң чоң шәһәрлири, хитайдики бәхтлик шәһәрләр тизимликигә киргүзүлмигән.

Лхаса шәһиридин радиомиз зияритини қобул қилған бир хитай пуқраси, бу баһалашқа қарита әҗәблиниш туйғусини ипадиләп “мән лхасада яшаймән, әмма өзүмдә бәхт туйғуси сәзмидим. Йәрлик тибәтликләр өзини бәхтлик һесаблиса буни билмәймән. Әмма мениңчә, лхасадики тибәтликләрдә хитайлишиш еғир болуватиду. Һазир тибәтликләрниң әнәниви кийимлирини пәқәт тибәт раһиплирила кийиду, башқиларниң кийгинини көрмидим. Бу йәрдики қурулушларму хитай услубида...” дәп җаваб бәргән.

Мәркизи һиндистандики тибәт сәргәрдан һөкүмити хитайни әйибләп “хитай даирилириниң диний чәклимә вә бастуруши сәвәбидин, һазирғичә 49 тибәтлик өзини көйдүрүп наразилиқини ипадилигән лхаса шәһирини әң бәхтлик шәһәр дәп елан қилиши, әмәлийәттә уларниң тәшвиқатидики ялғанчилиқ вә номуссизлиқни ипадилимәктә.” деди.